Shillong, Lber, 21
Ka jingbym salia shuh jong ki nongdie bad nongdih drok ban dih drok ha manla ki jaka ba ki ïoh ka la kylla long ka jingsyier mynsiem ïa kiba bun ki paidbah kiba leit bad wan na kylleng ki jaka khamtam na ki jaka kiba kham long sha kyndong.
Ïa kane ka la lap ha ka ‘lawbniap kaba don ha shilynter jong ka Bivar Road bad mih sha Saw Furlong Polo, Shillong ha kaba ki nongdie bad nongdih drok ki la pynkylla long kum ka ktem sah miet ha katei ka jaka.
Haba ïoh jingtip halor kane ha ka 21 tarik u bnai Lber, 2025, na ka liang ki pulit jong ka Sadar Police Sation ki la leit ban hiar khynra ïa kane ka ‘lawbniap ha kaba ki la lap ïa ki ïing dara bad ki plastik.
Ha katei ka jingkhynra ki pulit ki la lap ruh ïa ki thyrnia injekshon, ki waïar, ki jaiñ-ki nep, ki dawai kuli hynrei ym shym la lap pat ïa ki briew kiba sah ha kane ka jaka.
Ha kane kajuh ka sngi, ki pulit ki la bat ruh ïa lai ngut ki samla shynrang kiba dang shongkai ha kane ka ‘lawbniap bad hadien ba la dep kylli jingkylli ki la pyllait noh namar ba kine ki samla ki la phla ba ki shu wan shongkai pyngngad hajan kane ka ‘lawbniap kaba ki briew ki ju ïaid lynti man la ka sngi.
Hadien kane, ki pulit ki la pynpra lut ïa kine ki ïing dara bad rah lut ïa ki tum ki-tam baroh ban pynkhuid ïa kane ka khlaw.
