Shillong, Lber 21
Ar ngut ki khynnah jong ka PFR Football Academy, kita, u Habankara Blah jong ka U-13 bad u Meban -pynshngaiñ Khyriem jong ka U-15 ki la shah jied ban mihkhmat ïa ka Punjab FC ha ka U-13 Sub Junior bad U-15 Junior Elite League jong ka AIFF.
Kine ki khynnah ki la shah jied hadien ba ki la lah ban pyni ïa la ka sap ha ka jingpyrshang ba la pynlong da ka Punjab FC ha Shillong.
Ka Punjab FC ka long kawei na ki klob kaba pawnam jong ka ri bad kaba ïalehkai ruh ha ka Indian Super League (ISL). Ka jingshah jied jong kine ki khynnah ban don bad kane ka klob ka long kum ka jingai mynsiem ïa kiwei pat ki khynnah ka jylla.
Kane ka shlem ka kyrmen ba kine ki khynnah kin lah ban ïalehkai bha ha ka Sub Junior bad Junior League ka ban sa long shen jong ka AIFF.
Na ka liang jong kane ka shlem bad kumjuh ki kmie ki kpa jong kine ki khynnah, ki ai ka jingkhublei kaba kyrpang ïa ki Coach, kita, i Miss Nylla Mary Wahlang bad i Sir Jo kiba la trei shitom ban saiñdur ïa ka rukom ïalehkai jong kitei ki khynnah.
Kum ki kmie ki kpa ngi ïohi shisha ïa ka jingtrei shitom jong kitei ki Coach jong ka PFR bad ngi shem ba bun bah ki khynnah jong kane ka shlem ai jinghikai kynjat bol ki kiew shisha ha ka rukom ïalehkai ka jong ki lyngba ka jinghikai jong ki Coach ka PFR bad ngi shem ruh haba don kino-kino ki jingpyrshang ba la khot da ki klob kiba heh jong kane ka ri, ki khynnah jong ka PFR bunsien ki ju shah jied beit bad poi sha ka thong. Kumta kum ki kmie ki kpa ngim lah khlem da pynpaw ïa ka jingsngewnguh ïa ka jingtrei shitom jong ki Coach jong kane ka shlem, la bynrap iwei i kmie jong kitei ki khynnah.
Kane ka long ka kyrwoh na u President, Bah Franky Kharumnuid.
