Shillong, Lber 23
Ka long kaei-kaei ka sienjam ka ban sah kynmaw ïa ka Jylla baroh kawei bad ki Jylla jong ki thaiñ shatei lam-mihngi ka Ri ha kaba na ka liang ka Physical Medicine and Rehabilitation (PMR) Centre, ha ka 22 tarik u bnai Lber, 2025, ka la ïoh ban pyllait paidbah ïa ka kali ba kyrpang kaba lah ban kit ïa ki briew kiba don jingduna ha ki dkhot met bad ban pyndonkam da ki Wheelchair ïa kaba la pyllait paidbah da u Rev. Dr. RR Cunville ha ryngkat ka jingai ïa ka kyrkhu-kyrdoh lyngba ki jingduwai.
La pynlong ïa kane ka prokram ba lyngkot ha Bharat Scouts and Guides kaba don ha Laban ha kaba la pdiang sngewbha ïa ki paidbah nongwan ïashimbynta da u Dr. G Rangad.
Ïa kane ka sienjam ba la sdang da ka PMR Centre, yn lah ban ai jingshakri sha ki paidbah khamtam na ka bynta kito kiba pyndonkam ïa ka Wheelchair.
Ha kane ka sngi la ïoh ïa ka jingkren na ka Kong Rinalin Nongdhar kaba la batai halor ka rukom long rukom im jong ki briew kiba duna ha ki dkhot met bad la ïoh ruh ïa ka jingbatai shaphang katei ka Wheelchair Accessible Vehicle (WAV) na ka Dr. Lahunlang Sohliya kaba la pynshai halor kane ka projek.
Ka Dr. Lahunlang Sohliya ka la ong ba ki briew kiba biang ha ki dkhot met kim pat mad satia ïa kaei kaba ki briew ki bym biang ha ki dkhot ki mad ha ka jingim.
“Ngi kiba biang ha ki dkhot met, ngi don shibun ki lad-ki lynti kiba lah ban jied ban poi na kawei ka jaka sha kawei pat la ka long da ka arshaka, ka taksi, ka bos ne ban ïaid hynrei kine kiba duna ha ki dkhot met pat kim lah”, ong ka Dr. Sohliya.
Shuh-shuh, ka la ong ba na ka bynta kiba biang ha ki dkhot met, kane ka sienjam ban pyllait ïa ka kali ka long kaei-kaei kaba rit hakhmat jong ki hynrei hakhmat jong ki briew ba duna ha ki dkhot met pat, ka long ka kam kaba khraw eh ba la leh na ka bynta jong ki.
