Shillong, Lber 23
U Vice-Chancellor (VC) ka North Eastern Hill University (NEHU), Prof. P.S. Shukla u la kyrpad ïa ka jingïatreilang jong ki nonghi-kai ka skulbah ban pynurlong ïa ka thong pule jong ka NEHU nalor ka jingkular ban pynbeit noh ïa ka Career Advancement Scheme (CAS) kaba la sahteng mynta la slem.
“Ki jingkhang jong nga ki long kiba plie. Nga don hangne ban sngap, ban ïatreilang, bad ban kyrshan ïa phi iwei-pa-iwei ban pynurlong ïa ka thong pule jong ka NEHU. To ngin ïaid lang shakhmat, da kaba ïatylli ha ka jingthmu, bad ban trei ha ka ban pynlong ïa ka NEHU ka shlem pule kaba ngi baroh ngi sngew sarong,” ong u Prof. Shukla ha ka kyrwoh jingkyrpad sha ki nonghikai ka skulbah.
U la ong ruh ba ki nonghikai ki dei ki païa jingstad jong kane ka shlem pule, kiba ïalam bad btin lynti ïa ki khun samla bad pynwandur ïa ka lawei lyngba ka jingaiti jong ki sha ka jinghikai, ka jingwad bniah, bad ka jingnang-jingstad katkum ka National Education Policy (NEP).
Halor ki jingthut kiba la mih dang shen ha kine ki khyndiat bnai ba la dep, u la ong, “Nga tip khamtam kumno kine ki la pynslem ïa ki kam kiba kongsan, khamtam eh ïa ki jingkyntiew kyrdan CAS. Haba nga sdang ïa ka kam halor ka CAS ha ka sien kaba ar ha u snem ba la dep-2024, ka jingthmu jong nga ka long ban pyndep ïa ki jingkyntiew kyrdan hapoh u Lber 2025, da kaba buh hakhmat ïa kito kiba ha ki kyrdan ba hakhlieh duh ha ka kam jong ki, khamtam kito kiba la jan shongthait. Kaba sngewsih ka long ba ki jingeh ki bym shym la khmih lynti ki la pynslem ïa ka jingtreikam kaba dang bteng bad ïaid shakhmat.”
Haba pynpaw ka jingsngewsih halor ka jingpynslem, u VC u la pyntikna ba ka jingpynbeit khatduh halor ka CAS ka long ka mat ba kongsan tam bad kular ban pyndep ïa ki jingkyntiew kyrdan hapoh kine ki khyndiat bnai ban wan.
“Ka jingithuh bad jingai khusnam ïa ka jingtrei shitom, ka jingaiti, bad ki jingnoh synñiang jong ki ‘riewstad jong ngi ki long kiba donkam, bad nga kut jingmut ban pyntikna ba ki nonghikai kiba dei hok, kin ïoh ïa ka jingithuh khlem da pynslem shuh,” u la ong.
Haba pynsngew kumno ki jingthut ba dang shen ki la ktah ïa ki jingthmu ba kongsan ka NEHU – ka pule-puthi bad ka jingwad bniah, u Prof. Shukla u la ong ba ka jingslem ha ka liang ka jingpynïaid kam ka la pynslem haba phai sha ki jingmynjur kiba kongsan, ktah ïa ki samoi pule, bad pynmih ruh ka jingartatien hapdeng ki samla pule, ha kaba palat 82% na ki, ki dei na ka Jylla.
“Kine ki samla pule ki phai sha ngi na ka bynta ka jingkdew lynti, ka jinglong skhem bad ka jingnang-jingtip. Ka dei ruh ka jingkitkhlieh lang jong ngi ban pynbiang sha ki ïa ka jingpule kaba bha tam,” u la ong.
Shuh shuh u la bynrap, “Ka skulbah ka roi ka kiew haba ki nonghikai, ki nongtrei bad ki bor pynïaid jong ka, ki ïatreilang ha ka jingïadei bad ki nongrim jong ka jinghikai. Nga kyrpad ïa ka jingstad bad jingaiti lang jong phi: To ngin ïatreilang ban wanrah biang ïa ka jinglong skhem bad ban pynleit jingmut ha ki thong jong ngi – ka jingkiew ha ka jingpule, ka jingithuh ïa ki nonghikai, bad ka jingjop jong ki samla pule. Ka jingkiew shaphrang jong ka NEHU ka shong ha ka jingïatylli bad ka jingïohi jngai ba ïasam lang jong ngi.”
