Shillong, Lber 23
Ha ka nohphai sngi jong ka Sngi U Blei, la ïoh ban sakhi ba kiba bun ki bynta ha kylleng ki jaka jong ka East Khasi Hills ki la kylla lieh shaid naduh ki surok, ki madan da ka jingwan hap jong u phria ba jur ryngkat bad u slap.
Kane ka jinghap phria ka la neh kumba shi kynta tam ha kiba bun ki shnong bad don ruh ki shnong kiba la sakhi ïa ka jinghap phria kat ki marble. La lah ban sakhi ba ki shnong kum ka Mawreng, Laitpynter, Marbisu bad Kreit ha East Khasi Hills ki la kylla long kum kawei ka ri thah namar ka jingrben jong u phria uba la tap lut ïa ki jaka.
Ka Mawlai ruh ka la mad ïa ka jinghap u phria uba jur bha uba la neh da ka kynta bad ki jaka kiba kham jur eh ki dei ha ka thaiñ Mawlai Mawïong, Mawtawar, Umrynjah bad kiwei kiwei. Kumjuh, ha ki thaiñ Umroi, Bhoirymbong ruh la ïathuh ba ka jinghap u phria ka la jur bha bad ki madan, ki surok ki la lieh shaid da u phria.
Kane jingwan hap jong u phria ba jur ka la pynsyrtok ruh shipor ïa ka leit ka wan jong ki kali, ha kaba kiba bun ki la hap ban sangeh shwa namar ka jingbtuit jong ka surok bad ban lait na kino-kino ki jingjia.
Ha kawei pat ka jingjia na ka jingther jong u slap bad ka lyer, la sakhi ba u post sainar ilektrik ba khlaiñ ne High Tension (HT), u la khyllem hapdeng ka surok ha ka thaiñ marjan bad ka FCI, Mawroh, bad wanrah ïa ka jinglip bording ha kylleng ki shnong ka thaiñ Mawlai kum ha Mawroh, Nongmali, Pata bad Kyntonmassar.
Une u post ilektrik u la khyllem ha ka janmiet jong ka Sngi U Blei na ka jingkdiah ki tnat diengkseh kiba heh, kiba la leit ban beit-beit ïa ki sainar bad ïa une u post.
Kine ki tnat dieng ki la kdiah na ka jingkhyrwit ka lyer kaba wan ryngkat bad u slap lem bad u phria hynrei donbok ba ha kane ka jingkhyllem jong une u post ilektrik, ym shym la don satia kano-kano ka jingjia ne jingmynsaw.
