Shillong, Lber 23
Ka Khasi Students’ Union (KSU) ka la pdiang sngewbha ïa ki nongmihkhmat nabar ri kiba wan ban ïashim bynta ha ka lympung khaïi-pateng kaba 23 jong ka Shillong Trade Fair kaba dang ïaid shakhmat mynta bad ka ban sa kut noh ha ka 26 tarik u bnai Lber, 2025.
Kane ka jingïalang kaba thmu ban kyntiew ïa ka ïoh ka kot bad ka kolshor ha ka pyrthei, ka dang ïaid mynta ha Madan Ïewrynghep (Fire Brigade Ground), Laitumkhrah, naduh ka 5 tarik u Lber haduh ka 26 tarik u Lber, 2025.
Ha ka jingïalang kaba kyrpang kaba la long ha Shillong Club ha ka sngi Saitjaiñ jong ka 22 tarik u Lber, 2025, ki dkhot ka KSU ki la ai khublei ïa kitei ki nongwan jngoh bad pynpaw ïa ka jingkyrmen ba ka jingdon jong ki kan kyntiew bha ïa ka imlang sahlang jong ka jylla.
Haba ai jingkren ha kane ka sngi, u General Secretary ka KSU, samla Donald Thabah u la ong, “Katba ngi dang peitngor ïa ki jingeh kiba mih na ka jingwan buhai shnong beaiñ, khamtam na ki ri kum ka Bangladesh bad Nepal, ngi sngewkmen ban pdiang sngewbha ïa ki nongmihkhmat nabar ri kiba ïashim bynta ha kane ka tamasa khaïi-pateng. Ngi ngeit ba ka jingdon jong ki kan ïarap shibun ïa ka roi-ka par jong ka Jylla Meghalaya”.
U la pynshlur ruh ïa ki nongwan ïashimynta ha katei ka ïew ïadie-ïathied ban wad bniah ïa kiwei pat ki bynta jong ka Jylla bad ban lap ïa ki jinglah jong ka Jylla ha ka kam jngohkai pyrthei ki bym pat lah ban pyndonkam.
U samla Donald u la ïathuh lyngkot ruh sha kitei nongwan nabar ka Jylla bad ka Ri halor ka histori jong ka KSU bad ka jingshimkhia jong ka kaba la slem bha ban pynneh pynsah ïa ka jinglong tynrai jong ka Jaidbynriew Khasi katba ka dang noh synñiang sha ka roi-ka par jong ka jylla Meghalaya.
Haba pynpaw ïa ki mat ba kongsan kiba ka Jylla ka ïakynduh, u samla Donald u la pynpaw ïa ka jingsngewkhia halor ka jingkiew ka jingpep skul ki khynnah shiteng por, ka jingduna ka ïoh ka kot jong uwei pa uwei u briew, bad ka jingkiew ka jingbym donkam-donjam.
Haba jubab halor kine ki jingeh, u Rajesh Das, Vice President ka Shillong Trade Fair, u la ai jingmut ba ka KSU kan pyrkhat ban thaw noh ïa ka Civil Services Coaching Institute ne ka jaka ban ai jinghikai ïa ki samla kiba kwah ban ïakhun ïa ki eksamin bapher-bapher ha Shillong ban kyrshan ïa ki samla pule kiba don sap hynrei kiba duna ha ka ïoh ka kot.
U la tyrwa ruh ban buh ïa ki jaka ai jingmut na ka bynta ki samla pule ban ïarap ïa kito kiba kwah ban leit pule shabar jong ka Jylla. U Das u la pynpaw ruh ka jingsngewnguh ïa ki nongïalam ka KSU kiba la leh bha bad kular ruh ban pynneh pynsah ïa ka riti dustur bad ki jinglong ba kordor jong ka jylla Meghalaya.
Na ka liang u Mit Das, General Secretary ka Shillong Trade Fair, u la bynrap ba ka KSU ka lah ban ïatreilang bad ki tnat Sorkar Pdeng ban sdang ïa ki prokram pynroi ïa ki sap ki phong, kaba nang pynkhlaiñ shuh-shuh ïa ka jingpynkup bor ïa ki samla ha ka Jylla. U la ai jingmut ruh ban sdang shuh-shuh ïa ki ITI khnang ban pynmih shuh-shuh ïa ki samla kiba tbit ha ka liang ka jingstad ha ka jylla.
Ha ka jingïasam jingmut kaba bha, katto-katne ngut ki nongwan nabar ri ki la ai jingmut ban sdang ïa ki prokram pynkylla ïa ki samla pule nabar ri ban kyntiew ïa ka jingïadei ha ka pule-puthi bad ka kolshor hapdeng ka Meghalaya bad kiwei-kiwei ki Ri.
Ha kane ka sngi la pynkup burom ruh ïa kitei ki nongmihkhmat ka Shillong Trade Fair da ki nongïalam ka KSU, kiba kynthup ïa Vice President, Bah Biangbor Paliar, Assistant General Secretary, Bah Reuben Najiar, bad Finance Secretary, Bah Manly Nongpluh.
Kane kynhun nongïalam ka la ai sngewbha ruh ïa ki jingsah kynmaw sha ki nongmihkhmat jong ka Shillong Trade Fair ha kaba la ai sngewbha ïa ki da ki tiar tynrai Khasi kum ka Ryndia bad u Paila kum ka dak jong ka jingsngewbha bad ka jingsngew sarong ïa ka kolshor. La pynlong ruh ïa ka jingbam miet kaba kyrpang kum ka jingburom ïa ki nongwan. Ki nongmihkhmat nabar ri na ki ri kiba kynthup ïa ka Turkey, Afghanistan, Iran, Thailand, Lebanon, Ghana, bad Egypt ki ïashim bynta ha kane ka tamasa mynta u snem, kaba dang ïai bteng ban long kum ka jaka ba kongsan na ka bynta ka khaïi-pateng bad ka jingïatreilang ha ka kolshor ha kane ka thaiñ.
