Shillong, Lber 23
Ka lympung ïalehkai Inter Office Cum Corporate League T20 Cricket Tournament ba la pynïaid da ka East Khasi Hills Cricket Association ka la nangjam shaphrang ha kaba ka MLP Sohra ka la ïoh jingjop hadien ba ka la pynliem noh ïa ka NIT Meghalaya da 22 run ha ka sngi Saitjaiñ.
Ha kane ka jingïakhun kaba la long ha madan Saitsohpen kaba ha Sohra, ka MLP Sohra ka la jied ban tied nyngkong ha kaba ka la ïoh 194 run bad shah pynhap 3 wiket ha ki 20 over. U Ricky Nhadia u la long u nongtied uba la ïoh bun da kaba tied 85 run na ki 53 bol. Katba u Hriday M Kalita u la shim 1 wiket bad ai 34 run ha ki 4 over.
Haba wan beh ïa ka thong, ka NIT Meghalaya ka la ïoh tang 172 run bad shah pynhap 7 wiket ha ki 20 over. U Vickyson Lambert War u la long u nongtied ba ïoh buh da kaba tied 49 run na ki 49 bol. Katba u Phelps Kharjana u la shim 5 wiket bad ai 27 run ha ki 4 over bad ban ïohpdiang ruh ïa ka khusnam Player of the Match.
Haba phai sha kawei pat ka jingïa-khun kaba ar hapdeng ka Ribhoi Office Combine bad ka Combine SHG la shah pynthut noh ha u slap.
