Jowai, Lber 23
Uwei u samla na ka shnong Mukroh, West Jaiñtia Hills District u la kynnoh ba u la shah rahbor sha khlaw bad shah pynap suloi bad shah shoh shah dat ha lai ngut ki briew katba u dang don ha lynti ban leit sha lyngkha.
Ïa une u samla la tip kyrteng kum u Aibandari Sumer, 22 snem. Kane ka jingjia ka la jia ha ka por 10.00 baje mynstep jong ka 22 tarik Lber.
Katkum ka ejahar ba la ujor ha u Officer
In-charge ka Barato Outpost, la ong ba u Aibandari Sumer ryngkat bad paralok u Riham Sumer ki dang mut ban leit trei sha lyngkha kaba don ha Sanaro, Mukroh.
Ha lynti ha Sanaro, Mukroh la wan poi lai ngut ki briew uwei uba kam ïalade kum u kontraktor uba pyntrei ïa ka jingpynkhyllem ïa ki dieng ha Salang, Mukroh, katba uwei u pulit Assam bad uwei pat u briew ba ïa wanlang bad ki, ki la rah jubor ïa u, katba u paralok jong u, u la lait phet.
Shuh shuh, ka ejahar ka la ïathuh ba kitei lai ngut ki briew ki la rah jubor ïa u shapoh khlaw bad ki la khum ïa ki kti jong u shadien da ka sopti ba u phong bad ki la pynap da ka suloi ïa u (gun point) bad maham wat ban pynïap ïa u, nangta ki la bom la shoh ïa u haduh ba um tip briew shuh.
Hadien ba ki la dep leh ïa kane ka kam bad hadien katto- katne por u Aibandari u la kham ïoh bor bad kyndit bynriew bad kita lai ngut ki briew ruh kim don shuh ha kata ka jaka bad u la wan phai noh sha la ïing, la ong ka ejahar.
Halor kane, u Aibandari Sumer u la kyrpad ïa ki bor jong ka aiñ ban shimkhia bad ban pynshitom ïa kine lai ngut ki briew kiba donkti ban thombor ïa u.
Halor kane ka jingjia haba ïoh ban ïakren bad u Secretary Shnong Ma Precious Sten, u la pynpaw ka jingsngewdiaw namar ba ka Dorbar Shnong Mukroh na ka por sha ka por ka ju pynsngew sha ki bor pynïaid district jong ka West Jaiñtia Hills kumjuh sha u CEM jong ka JHADC bad wat sha ki bor Sorkar halor ki jingeh bad jingshah pyndik jong ki nongshong shnong ka Mukroh hynrei u la ong ba na ka liang ka Sorkar ka sngap mynthi.
U la ong ba ka dorbar shnong ka la dawa ruh ban buh ïa ka BOP ha Mootha Siangkwai khnang ban lait na kum kine ki jingjia.
Lah ban kdew ba shisngi shwa kane ka jingjia, u Deputy Commissioner ka District u AK Singh u la pynlong ïa ka jinghiar jurip dalade ha ka 21 tarik u Lber sha ki thaiñ khappud jong ka shnong Mukroh haba ka KAAC ka la shna beaiñ ïa ki surok bad ïa ka kper slasha.
