Shillong, Lber 23
U kapten ka Bangladesh u Jamal Bhuyan u la pynïa-syriem ïa u Hamza Chou-dhury kum u Messi jong ka kynhun ïalehkai ka ri jong u, hynrei um shym la kwah ban pynïanujor ïa u bad khlur ïalehkai ka India, u Sunil Chhetri.
U Bhuyan u la ai jingïaroh ïa u paralok jong u na India, uba don ha ka kyrdan kaba saw ha ka thup jong ki nongthep kol ha ka pyrthei, kita, hadien u Cristiano Ronaldo (135), Lionel Messi (112), bad u khlur barim jong ka Iran u Ali Daei (108). U Chhetri u la wanphai na kaba shong-thait ban thep ïa ka kol kaba 95 na ka bynta ka India ha ka jingïalehkai paralok pyrshah ïa ka Maldives ha Shillong myn ha ka 19 tarik mynta u bnai.
“Ngam tharai ba phi lah ban ïanujor ïa u Sunil bad u Hamza”, la ong u Bhuyan ha ka jingïalang bad ki nongthoh khubor. “Nga tharai ba u Sunil u dei u nongïalehkai uba tbit bha, u la leh ïa ka kam kaba khraw na ka bynta ka ri jong u. Hynrei ngin ïakren beit, u Hamza u dei u rangïalehkai jong ka English Premier League.”
Ka Bangladesh kan ïakhun pyrshah ïa ka India ha ka wat kaba nyngkong jong ka AFC Asian Cup qualifier ka ban long ha ka 25 tarik mynta u bnai ha kane ka nongbah bad kan long ka sien kaba nyngkong eh ïa u Hamza rangïalehkai shapdeng barim ka Leicester City ban ïadon bynta ha kane ka jingïakhun.
U Hamza, uba dei u rangïalehkai ka Sheffield United uba la ju mihkhmat teng ïa ka England ha ka kyrdan ïalehkai Under-21 bad Under-23, u la jied ban mihkhmat ïa ka Bangladesh, ka ri kaba la kha ïa ka kmie jong u.
U Bhuyan, uba kum u Hamza, la kha shabar ha Denmark, hynrei u la jied ban mihkhmat ïa ka ri jong ki kpa tymmen jong u, u tip ïa kaei kaba une u rangïalehkai ba thymmai u wanrah ha ka kynhun jong u. “Ka la long kajuh ka jing-long ha ka por ba nga wan. Mynta u Hamza, rangïalehkai-Premier League, u wan sha ka kynhun ka long kum ban ong ba u Messi jong ngi un wan. Nga tharai ba u ïahap bha.”
U Bhuyan u la ong ba u sngewkmen ïa ka jing-pdiang sngewbha kaba khraw kaba u Hamza u la ïoh na ki nongkyrshan jong ka Bangladesh. “Da ka jingwan jong u Hamza ha ka kynhun, ka ai mynsiem shibun ïa kiwei pat ki nongïalehkai phutbol ha kylleng ka pyrthei ban wan sha Bangladesh bad ban ïalehkai na ka bynta ka kynhun ïalehkai jong ka ri. Ban mihkhmat ïa ka ri Bangladesh ne ka ri trai jong phi ka dei ka kam kaba ha khlieh duh ban long u nongïalehkai phutbol. Nga pyrkhat, ha ka 25 tarik haba u Hamza u ïohsngew ïa ka jingrwai ri (national anthem), un sdang ban ïalehkai.”
U Hamza u la ong ba u sngewkmen ïa ka jingpdiang sngewbha hynrei u la kam ba um don hapoh ka jingpynbor. “Ha kaba kut jong ka sngi, ngi ïalehkai ïa ka jingïalehkai phutbol. Ngam sngew ïa ka jingeh. Nga don tang hangne ban pyrshang bad pynbha ïa ka kynhun,” la bynrap u Hamza.
