Shillong, Lber 24
Ka kynhun ïalehkai ka ri India ka la long ba la pynkhreh ban ïakhun pyrshah ïa ka Bangladesh ha ka wat kaba nyngkong jong ka AFC Asian Cup 2027 qualifier ka ban long ha ka Sngi Ba-ar ha Jawaharlal Nehru Stadium, Shillong ha ka por 7 baje janmiet.
Kane ka jingïakhun ka long kaba kongsan namar baroh ar tylli ki kynhun ki donkam ban jop ha kane ka jingïalehkai kaba nyngkong jong ka Group-A. Kawei pat ka jingïakhun jong kane ka group hapdeng ka Singapore bad ka Hong Kong kin ïakhun ha kane kajuh hi ka sngi. Dei tang ki kynhun kiba wan ha ka kyrdan ba hakhlieh duh kin ïoh rung sha kawei pat ka wat jingïakhun.
“Ka jingïalehkai kaba nyngkong ka long borabor kaba kongsan. Ka dei ka jingïakhun kaba lyngkot, tang ka kynhun kaba wan ha ka kyrdan ba hakhlieh duh ka lah ban rung sha katei ka lympung,” la pynpaw u coach ka India u Manolo Marquez ha ka jingïalang bad ki lad pathai khubor ha ka Lah Sngi U Blei.
“Ki don hynriew tylli ki jingïalehkai ha kane ka group bad ngi donkam ban pyndep nyngkong. Ngi kwah ban kamai bun poiñ khang ban ïoh rung sha Saudi Arabia.”
Kum ka jingpynkhreh na ka bynta kane ka jingïakhun kaba kongsan, ka India ka la ïashim bynta ha ka jingïalehkai paralok pyrshah ïa ka Maldives ha ka Sngi Balang ba la dep bad ruh ban jop da 3-0 kol. Kane ka long ka jingjop kaba nyngkong eh naduh ba la shimti da u Marquez ha u snem ba la dep. Ïa kitei ki kol la thep da u Rahul Bheke, Liston Colaco bad u Sunil Chhetri, uba la wanphai da kaba shongthait bad mynta u la kynjoh sha 95 tylli ki kol ha ka jingïalehkai bar ri.
Haba pynpaw halor ka jingwanphai biang jong u Chhetri sha ka kynhun bad ban thep kol biang, u Marquez u la ong, “U Sunil u dei u nongïalehkai ba paw ha ka phutbol jong ka ri India bad u la long u nongthep kol uba bun eh ha kane ka samoi. Ngi la don jingeh ban thep kol ha ki khyndiat tylli ki jingïalehkai kiba nga la shimti. Te kumta nga tharai ba u dei u nongïalehkai ba radbah na ka bynta jong ngi.”
Na ka liang u rangïalehkai shadien ka ri u Sandesh Jhingan, uba la synran lang ïa u Marquez ha ka jingïalang bad ki nongthoh khubor, u la bynrap, “Ngi ju khmih lynti ba un thep kol. U la don 95 tylli ki kol. Ngi sngewkmen ban ïoh biang ïa u. Da ka jinglong ba u don, u long ka jingma ha manla ki kynhun, ym tang ïa ka Bangladesh.”
“Kawei kaba ngi tip ka long ba manla ka por ba ka India ka ïalehkai bad ka Bangladesh, ngi khmih lynti ïa ka jingïalehkai kaba itynnad. Ngi la pynleit jingmut bha ban ïoh ïa ka jingjop ka jong ngi. Lada phi pynkhreh bha, phi lah ban pynliem ïa kano-kano ka kynhun, bad lada ym dei, kano-kano ka kynhun ka lah ban pynliem ïa phi. Ngi leit sha manla ka jingïalehkai da ka jingmut kaba bha,” la bynrap utei u rangïalehkai ba la 31 snem ka rta.
Wat hapdeng ka jingïapher kaba jngai ha ka liang ka kyrdan hapdeng ka India (126) bad ka Bangladesh (185) ha ka pyrthei, u Marquez u la pynpaw ba ka kyrdan kam dei kaba pyni ïa ka jinglong jong ka kynhun, bad ka jingpynrung ïa u rangïalehkai shapdeng u Hamza Choudhury kan nang pynkhlaiñ shuh shuh ïa ka Bangladesh.
“Ka Bangladesh ka don ïa ki rangïalehkai kiba tbit bha. Ki la don ïa ujuh u coach u Javier Cabrera ha kine ki lai snem ba la dep da kajuh ka jingmut jingpyrkhat. Kiba bun na ki rangïalehkai ki dei kijuh naduh ba ki ïakhun pyrshah ïa ka Maldives ha u Naiwieng mynshem snem.”
Ha kawei pat ka liang u coach ka Bangladesh, u Javier Cabrerau la ong, “Nga pyrkhat ba kan long ka jingïalehkai kaba itynnad bha. Ngi don ka jingangnud kaba khraw. Ka kynhun ka la ïalehkai bad trei shitom la 24 sngi mynta, kaba long ka por kaba jrong da shisha. Ngi sngewskhem, ngi kham khlaiñ ban ïa kaba mynshuwa, bad ngin kyrmen ba kin ïakhun tyngeh pyrshah ïa ka India.”
Kumjuh, u kapten bad uba dei u rangïalehkai shapdeng ka Bangladesh, u Jamal Bhuyan, uba la ïalehkai teng ïa ka Mohammedan Sporting ha ka I-League, u la ong, “Ka long kaba sngewtynnad ban wanphai biang sha India. Nga don ki jingkynmaw kiba bha hangne, kumta, shisha, nga sngewkmen na ka bynta kane ka jingïalehkai.”
