Shillong, Lber 24
Ka Khasi Students’ Union (KSU) lyngba ka Employment Monitoring Cell ha ka Lah Sngi U Blei ka la leit ban ïakynduh ïa ki bor pynïaid ka NEIGRIHMS namar ka jingduna palat ka jingbhah kam ha ka thup kyrdan ‘Schedule Tribe’ (ST) bad dawa ruh ban wanrah jingkylla ha ki kyndon thung kam ne ki ‘Recruitment Rules’.
“Ngi la wan ïakynduh ïa u Deputy Director ka NEIGRIHMS halor ka jingpynbna ba dang shu pyllait haba ïadei bad ki kam bapher-bapher. Ngi ïohi ba ka duna palat ka jingbhah kam ha ka thup kyrdan ST,” ong u Chairman ka KSU-Employment Monitoring Cell, samla Reuben Najiar haba kren sha ki lad pathai khubor.
Haba kdew ba ha shuwa la pynïaid ïa ka eksamin nos da ka Nursing Officer Recruitment Common Eligibility Test (NORCET), u samla Najiar u la ong ba ha kato ka por, ka la mih ka jingpynbna ha u snem 2023 bad hadien kane, ki la don 200 tam ki kam kiba la pynmih bad na kine, la jied ïa 194 ngut, hynrei ki don pat tang kumba 6 ne 7 ngut ki Khasi kiba ïoh ïa ka kam nos (ha uto u snem).
Halor kane, u la ïathuh ba ha u snem 2024, ka seng ka la ïakynduh ïa katto-katne ki tnad treikam ka Sorkar ban pyrshah halor ka jingwan ka NORCET ban pynïaid ïa ka eksamin bad ha kane ka kynti la ïohi ba ka NORCET kam don shuh bad ïa ka eksamin la pynïaid hi da ka NEIGRIHMS.
“Hynrei haba phai pat sha kine ki kam nos kiba lait, ngi ïohi ba ki don kumba 105 tylli (kiba lait), hynrei hadien ka jinglait jong kine ki kam, ngi ïohi ba ki don tang 2 tylli ki kam na bynta ki ST, nalor kiwei-kiwei ki kam na bynta ki OBC, SC, EWS bad ter-ter – ki kam ki kham bun haba ïadei bad kine,” u la ong.
Haba pan jingshai halor kane, u samla Najiar u la ïathuh ba u Deputy Director u la ong ba kine ki kam ki ïaid katkum ka ‘Roster’ bad katkum ki kyndon thung kam ka Sorkar Pdeng.
“Ngim shym hun ïa kata ka jubab, bad ngi la ïatai nia bad ong ba ka NEIGRIHMS ka don ha Jylla jong ngi bad nyngkong eh ka dei ban peit ïa ka jingdonkam jong ki samla jong ngi,” u la ong.
Haba pynpaw ba bun ki samla kiba pyndep ïa ka jingpule nos man u snem, u la ong, “Ngi ïohi ba ka Sorkar Jylla ka phah ïa ki nos jong ngi sha Japan bad shawei-shawei. Hooid ngi kmen ba ki ïoh kam, hynrei ha kajuh ka por, ngi dei ban peit, haba kane ka shlem ka don hangne, te balei pat ki wan da kiwei ban trei hangne. Lada ong pynban ba kim pat lah…hooid ngi sngewthuh, hynrei ki bun ki nos jong ngi kiba lah ban trei hangne.”
Na ka liang ka KSU, ka la pynsngew ruh ba dei ban wanrah jingkylla ha ki ‘Recruitment Rules’ jong ka NEIGRIHMS bad ha kine ki sngi ban wan, ka seng kan sa ai ka dorkhas sha ka Sorkar Pdeng khnang ba kan ai ka ‘Special Exception’ katkum ka jinglong-jingman.
Halor ka jingpynjlan ïa ka rta thung kam (naba ka rta khatduh ban thep ïa kine ki kam ka long 30 snem), u Chairman u la ong ba u Deputy Director u la pynshai ba ka rta ba la buh da ka Sorkar Pdeng ka long 27 snem hynrei la pynjlan sha ka 30 snem.
“Ka seng kan sa khmih bniah halor kane,” u la ong.
Shuh shuh haba ïadei bad ka jingngat thoh eksamin jong ki samla Khasi sha kiwei pat ki jaka shabar ka Jylla kum sha Guwahati, Kolkata, u samla Najiar u la bynrap u Deputy Director u la kular ha ryngkat bad ki ‘Agency’ ba ïateh, ba ki eksamin na bynta ki samla Khasi kin long beit hapoh ka Jylla.
