Shillong, Lber 24
Ka Shillong Lajong FC ka la mad biang ïa ka jingshah rem ha ka lympung ïalehkai I-League, hadien ka la shah pynliem noh ha ka Inter Kashi da 2-1 kol ha ka Lah Sngi U Blei ha Kalyani Stadium kaba ha West Bengal.
Kane ka jingshah rem ka la pynlong ïa ka Lajong (26 point) ban hiar sha ka kyrdan ba hynñiew, katba ka Inter Kashi ka la jam sha ka kyrdan ba ar na ka bynta ban ïaryngkat mar 38 point bad ka Churchill Brothers, kaba dang lamkhmat lyngba ka jingïapher kol.
Dangshen, ha ka jingïalehkai ba la dep ka Lajong ka la shah rem ha ka Rajasthan da 4-0 kol. Pynban ha kane ka jingïakhun kam shym la lah ban ïalehkai bha ha kaba ka la shah thep ar kol ha ka kylla step lyngba u Nikola Stojanovic (33′) bad u Mario Barco (39′). Hynrei dei ha ka kylla miet ka la lah ban pynphai kylla shi kol lyngba u Batskhemlang Thangkhiew (78′) ha shwa ba kan shah rem.
Te kumta ka Lajong ka dang sah sa ar tylli ki jingïalehkai ha kane ka aïom bad kine kin long ha la ïing pyrshah ïa ka Aizawl FC ha ka 29 tarik mynta u bnai bad ïa ka Delhi FC ha ka 5 tarik u Ïaïong.
