Nongstoiñ, Lber 24
Ka Pynoh Ri War FC na South West Khasi Hills ka la jam sha ka quarter final ha ka lympung ïalehkai Open To All Knock Out Football Tournament 2024-25 ba la pynlong da ka New Nongstoiñ Sports Social & Cultural Club.
Kane ka jinglah ban pynthikna ka la wan urlong hadien ba ka la lah ban pynliem noh ïa ka Shiparalok FC da 2-0 kol ha ka jingïalehkai pre-quarter final kaba la long ha ka Lah Sngi U Blei ha madan New Nongstoiñ.
Ïa ka nam Man of the Match la ïohpdiang da u Batskhem Thongni, uba la lah ban thep ar kol na ka bynta ka Pynoh Ri War ha ka minit kaba 33 bad 90+3.
Shwa ban sdang kane ka jingïakhun la ïadon lang ar ngut ki MDC ba kynthup ïa u Bah Srally Rashir, MDC ka Mawshynrut bad u Dr. Juristman Ïawphniaw, MDC ka Nongstoiñ Constituency kiba la ai khublei ban kitbok ïa baroh ar ki kynhun bad la synran lang ïa ki da ki dkhot jong ka NNSSCC.
Lah ban kdew hangne ba ha katei ka lympung ki don 16 tylli ki kynhun na kylleng ki jaka jong ka Jylla ki la wan ban ïashim bynta bad ka khusnam baroh ha kane ka lympung ka long T.8 lak tyngka.
Na ka liang ka NNSSCC ka la pyntip ba ka jingïalehkai kaba khatduh jong ka pre-quarter final kan long ha ka 28 tarik mynta u bnai hapdeng ka Lamare FC na nongbah Shillong pyrshah ïa ka Warsan Lyngdoh FC na South West Khasi Hills ha ka por 2:30 nohphai sngi ha madan New Nongstoiñ.
