Shillong, Lber 24
Ki runar bym lah ban ithuh ki la thang dusmon ïa ki ar tylli kper thung dieng kiba don ha South West Khasi Hills, ha kaba ka jingjulor ka la kot da ki phew lak tyngka.
Katkum ka khubor kaba la ïoh na ki pulit la ong ba u Demonstrator jong ka tnat Soil & Water Conservation ka South West Khasi Hills u la ai ka jingujor ba ha ka 17 tarik mynta u bnai ha ka por kumba 2.30 janmiet, ki runar bym lah ban ithuh, ki la thang dusmon ïa ka kper thung dieng kaba don ha Mawthlong Centre ha ka shnong Rohbah ha SWKH. Ha kane ka jingjia ki tynrai dieng ki la julor bad ka jinglut jingsep baroh ka la kot sha kumba T.7 lak eiei.
Ha kawei pat ka jingujor, kaba la ai da u Demonstrator ka tnat Soil & Water Conservation ka South West Khasi Hills, ka long ba ha ka 18 tarik mynta u bnai ha ka por kumba 9 baje mynstep, ki runar bym lah ban ithuh, ki la thang dusmon ïa ka kper thung dieng kaba don ha ka shnong Wahsiej ha South West Khasi Hills. Na kane ka jingjia, ki dieng ba la thung ki la julor bad ka jingduh na kane ka la kot sha kumba T.4 lak eiei.
