Shillong, Lber 24
U Symbud Myntri Rangbah ka Jylla ba khmih ïa ka tnat Transport, Bah Sniawbhalang Dhar, ha ka Lah Sngi U Blei u la khot ïa ka jingïalang bad baroh ki tnat ba don bynta na ka bynta ban wanrah ka jingshngaiñ ha ki surok bad ban ïada na ka jingjia tyngkhuh kali, ha kaba la ïathir halor ka ‘Road Safety’ bad ban teh lakam ïa ka jingstet palat pud ki kali.
Haba kren sha ki lad pathai khubor u la ong ba ka Sorkar kan sa pynmih ïa ka jingpynbna ban pyntreikam noh da u pud ïa ka jingñiah stet ki kali bad kumjuh ki ar shaka ‘speed limit’ ha ki surok bapher-bapher hapoh ka Jylla na ka bynta ban ïada ïa ki jingduh ki jingim, ban pynduna ïa ki jingjia tyngkhuh kali bad wanrah ka jingshngaiñ ïa baroh kiba ïaid ba ïeng.
“Ngi la pynkhreh ïa kane bad hapoh 2-3 bnai ngin sa lah ban wanrah ïa ka jingpynbna halor u pud ba lah ban ñiah stet ïa ki kali ha ki surok ha ki jaka sor bad ki surok bah”, u la ong.
Na ka liang u Symbud Myntri Rangbah u la kyntu ïa ka tnat Pulit ban pynthikna ba kan don ka jingpyrkhing kaba jur ïa ka jingñiah stet palat pud ki kali, bad u la ïathuh ruh ba la bthah ïa baroh ki tnat ba don bynta ba kin shim ïa baroh ki sienjam ban teh lakam ïa ki jingjia tyngkhuh kali ha ki jaka ba la ithuh kum ki jaka ba jur bha ba mih ki jingjia.
“Ki don ki jaka kiba ju jia bha ki jingjia aksiden bad ngi la bthah ba dei ban pynbeit ïa ki jingbthah ban pynthikna ba ki jingjia aksiden ki dei ban duna hadien habud, ngi la kyntu ïa ki ban buh ïa ki ‘speed breaker’ bad kiwei ki lad ban ïada”, u la ong.
