Shillong, Lber 26
Ka jingap khmih lynti ka skul O.M Roy Memorial Secondary School ban pdiang sngewbha ïa u Myntri ka tnat ïalehkai u Bah Shakliar Warjri ha ka prokram pynkup burom ïa ki khynnah ïalehkai kiba la wanrah nam bad burom ïa ka Jylla ha kiba bun ki lympung ïalehkai kam shym la urlong na ka daw ba utei u Myntri u la pyntip ha ka khyllipmat kaba khatduh ba um lah ban poi sha kane ka jingïalang kaba la long ha ka Sngi Balang na ki daw bym lah kiar.
Hynrei ha ka jaka u Myntri la wan mih bujli noh da ka Sports Officer ka tnat ïalehkai Kong Dalin Khonglam kum ka kongsan bad u District Sports Officer (DSO) ka East Khasi Hills Bah O. Mawthoh, uba la wan mih bujli ha ka jaka u Director ka tnat ïalehkai u D.D Shira kum u symbud kongsan.
Kane kam dei shuh ka sien kaba nyngkong halor ka jingbym wan poi jong utei u Myntri ka tnat ïalehkai sha ki jingïalang ba la khot sngewbha da ki kynhun bapher bapher ne wat ha ki prokram ba la ju pynlong da ka tnat ïalehkai ka Sorkar ka Jylla.
Haba ai jingkren ha kane ka sngi, na ka liang ki nongpynïaid skul kynthup ïa ka Principal Kong A. Syiemlieh ki la pynpaw ïa ka jingdiaw mynsiem halor ka jingbym lah ban poi jong utei u Myntri namar ha ka jingshisha ki da kwah eh ïa ka jingwan ïuhkjat u Bah Shakliar ha ka sien nyngkong hapoh katei ka skul. “Ha ka jingshisha ngi la da leit ïakynduh kyrpang ïa u Bah Shakliar ha ka kamra treikam jong u ha Secretariat na ka bynta ban khot sngewbha sha ka jingïalang kaba kyrpang jong ka skul jong ngi namar ki khynnah skul mynta u snem ki la lah ban wanrah burom ym tang ïa ka skul, hynrei wat ïa ka Jylla hi baroh halor ka jinglah ban khur takma ha ka Meghalaya Games 2025 bad ki kynhun ïalehkai phutbol Under-15 bad Under-17 ki la rah ïa ka nam lahduh ruh ha ka Reliance Foundation Youth Sports.”
Kumjuh, u Bah K. Syiemlieh, President ka Managing Committee jong katei ka skul u la pynpaw, “Ha ka jingshisha ngi dang khmih lynti ïa ka jingïadon lang u Myntri ka tnat ïalehkai bad u Director ka tnat ïalehkai ha kane ka prokram kaba kyrpang jong ka skul ka jong ngi. Ha ka jingshisha mynta ka sngi kan dei ka sien kaba nyngkong ba u Bah Shakliar un wan ïuhkjat hapoh ka skul jong ngi hynrei kane kam urlong satia.”
Ha kawei pat ka liang ka Kong Dalin ka la pynpaw ka jingkmen ban ïadon lang ha kane ka jingïalang pynkup burom ïa ki khynnah kane ka skul. “Kum ki khynnah ki dei ban sngewthuh ba ka kam ïalehkai ka dei ban ïaid ryngkat bad ka jingpule, te kumta ki donkam ban don ïa ka thong ban pynjanai ïalade ha baroh ar tylli ki bynta lyngba ka jingtrei shitom ka jong ki khnang ba kin lah ban kynjoh sha ka thong.”
Ha kane ka sngi katei ka skul ïa kaba la seng naduh u snem 1992 ha Mawlai Kyntonmassar, ka la pynkup burom ïa ki khynnah ïalehkai kiba la khur takma ha ka 6th Meghalaya Games 2025 kata ha ka jingïalehkai Karate, Judo, Archery bad kiwei kiwei. La pynkup burom ruh ïa ka kynhun ïalehkai phutbol Under -15 bad Under -17 kiba la lah ban khur nam lahduh ha ka Reliance Foundation Youth Sports na ka bynta ka Meghalaya.
La wan ban pynshngaiñ lang ha kane ka sngi da ki nongïalam ka 4 For All Academy, kumjuh u Football coach jong SAI STC Shillong, u Rangbah Dong ka Mawlai Kyntonmassar u Bah A. Biam, ki kmie ki kpa jong ki khynnah bad kiwei.
Lah ban kdew ba ka skul O.M Roy ka la sdang ban shim bynta ha ka jingïalehkai Athletics ba la pynïaid da tnat ïalehkai ka Sorkar Jylla ha u snem 1993 bad ka la ïohpdiang ruh ïa ka nam Best Athlete. Uwei na ki khlur nongmareh ba paw ka jylla u Bah Biningstar Lyngkhoi u la long teng u nongïalehkai uba la mihkhmat teng ïa katei ka skul.
Naduh u snem 2005 katei ka skul ka la sdang ban shim bynta ha ka jingïalehkai phutbol ha ki lympung ïalehkai bapher bapher ha kaba ka la rah haduh hynñiew sien ïa ka nam lahduh ha ka lympung ïalehkai ba la pynïaid da ka FKJGP, kumjuh ka la rah nam lahduh ha ka Subroto Cup 2013 ha nongbah Delhi bad mynta u snem ka la rah nam lahduh sa ha ka Reliance Foundation Youth Sports kaba la long ha kane ka nongbah.
