Houston, Lber:
Ki bor pyniaid ka nongbah Texas ha ka Sngi Nyngkong, ki la pyntip ba ki la lap ia ka metiap jong uwei u rangbah nong India, uba la don 30 snem ka rta, na ka thaiñ Princeton jong ka nongbah Texas ha ka Sngi U Blei, ha kaba ki bor pyniaid ki suba ba ka dei ka jingpyniap hi dalade hynrei ka jingtohkit ka dang iaid shakhmat ban lap ia ka daw bad ki jingshisha baroh haba iadei bad kane ka jingjia.
U Abhishek Kolli, uba long u nongshong shnong jong ka Gudivada ha distrik Krishna jong ka jylla Andhra Pradesh, la ioh jingtip ba u la jah ha ki khyndiat sngi ba la leit bad tang kumta hi ki bor pyniaid ki la buddien bad phah thwet bad ban lap ia utei u nong India, nangta la kyntu ruh ia ki riew paidbah ba kin iarap ban pyntip mar-mar sha ki bor pyniaid lada ki iohi ia utei u briew ha kano-kano ka jaka.
Hynrei tang ha ka sngi kaba bud ba la pynmih ia katei ka jingpynbna, la lap noh ia ka met jong u bad na ka liang jong ki bahaiing-bahasem jong u ki la pynpaw ka jingsngewsih kaba jur haba iadei bad ka jingiap kyndit jong u bad ki la kyntu ia ki bor pyniaid ba kin pynioh ia ka hok jong u bad ban wad ia ka daw jong ka jingiap jong u ha katei ka nongbah.
U Kolli, u dang shu dep iathoh shongkurim dang shi snem mynshwa bad u la poi sah ryngkat bad ka kurim jong u ha Phoenix, hapoh ka nongbah Texas hi, ha shwa ba un leit sah noh sha Princeton.
U hynmen ba marwei jong u pat, u Aravind Kolli, u la pynpaw ba u Abhishek, u la sah khlem kam- khlem jam ha kine ki hynriew bnai ba la dep bad u dang ïakhun bad ka jingeh ha ka liang ka pisa tyngka bad ka ioh- ka kot jong u.
