Jowai, Lber 26
U Chief Executive Member (CEM) jong ka Jaiñtia Hills Autonomous District Council (JHA DC) Ma Thombor Shiwat u la wanrah ïa ka pla mang tyngka kaba duna haduh T.11,32,88,300 namar ka jinglut jingsep kaba long haduh T.257,23,44,200 kaba tam ïa ka jingïoh kaba poi T.245,90,55,900 ha ka sngi kaba nyngkong jong ka Dorbar Mang Tyngka kaba nyngkong naduh jong ka samoi treikam kaba thymmai jong ka JHADC ha ka 26 tarik Lber.
Haba wanrah ïa katei ka mang tyngka, u Ma Thombor Shiwat u la ïathuh na ka daw jong ka jingïoh ïa ka bhah jong ka khajna marpoh khyndew remdor ne major mineral ha u bnai Kyllalyngkot mynta u snem ka council ka la ïoh ban siew ïa ka tulop jong ki nongtrei jong ka na bynta 15 bnai kynthih. U la ïathuh ruh ba ka council ka la ïoh pdiang haduh 6.32 lak tyngka na ka Sorkar Kmie lyngba ka skhim ba la tip kyrteng kum Digital India Land Record Modernization Programme.
U Chief Executive Member jong ka JHADC u la ïathuh shuh shuh ba ka Council ka la ïoh pynshna haduh 422 ki kam pynroi kiba kynthup ïa ki surok, ka jingthied ïa ki tin sop ïing ne CGI Sheets nalor kiwei kiwei de na ka Tied Grant bad Untied Grant. U la bynrap ba kum ka lad ka lynti ban pynhiar ïa ka jinglut jingsep la pynduna ïa ki nongtrei jong ka JHADC na ka 1490 sha ka 1215 ngut.
U Ma Shiwat u la wanrah ïa ka mat ban mang tyngka shuh nalor kaba la dep mang lypa mynshwa ne ka demand for supplementary grants na ka bynta ka jinglut ka jingsep ban kut haduh ka 31 tarik u bnai Lber na bynta 16 tylli ki tnat treikam jong ka JHADC bad lada kyllum lang katei ka supplementary grant ka la poi haduh 26, 73, 60, 700 tyngka. U la ïathuh ba ka supplementary grant ka long 3, 68, 69, 300 tyngka na bynta ka tnat General Administration, 1, 69, 90, 900 tyngka na bynta ka tnat Finance & Accounts, 2, 52, 62, 300 tyngka na bynta ka tnat Land Revenue & Land Reform, 2, 52, 62, 300 tyngka na bynta ka tnat Land Record & Land Settlement, 1, 54, 57, 900 tyngka na bynta ka tnat Taxation, 3, 61, 10, 000 tyngka na bynta ka tnat Forest, 26, 40, 100 tyngka.
U la ong shuh shuh na bynta ka tnat Political, 1, 91, 14, 800 tyngka na bynta ka tnat Civil Work, 6, 78, 10, 500 tyngka na bynta ka tnat Education, 25, 60, 400 tyngka na bynta ka tnat Arts & Culture 54, 65, 300 tyngka na bynta ka tnat Market, 22, 90, 300 tyngka na bynta ka tnat Statistic & Information, 18, 60, 000 tyngka na bynta ka tnat Stationery & Printing, 25, 55, 200 tyngka na bynta ka tnat Planning , 12, 58, 000 na bynta ka tnat Judicial bad 2, 05, 65, 200 na bynta ka tnat Legislative.
Haba wanrah ia ka kaiphod jong ka Executive Committee, u Ma Shiwat u la ïathuh ba u la dep thung san ngut ki MDC kum ki Chairman jong ki komiti treikam bapher bapher jong ka Council bad kitei ki long Ma Moonlight Pariat jong ka Planning Board, Ma Reformingson Lamare jong ka Chairman Customary Law Committee, Ma Krison Langstang jong ka Resource Mobilisation Committee, Ma Worshipman Shadap jong ka Land Revenue and Land Reform katba u Ma Mihnyngkong Sutnga jong ka Rules Advisory Committee nalor Ma Wailaddameshwa Siangshai kum u Honorary Forest Adviser.
