Guwahati, Lber:
Ha ka jingïakhih kaba tyngeh pyrshah ïa ki jingkynnoh ba don ki jingbym ïaid beit ha ka liang ka pisa tyngka hapoh ka Assam Cooperative Apex Bank Ltd., ka Jatiya Yuva Sakti, ka kynhun samla jong ka Assam Jatiya Parishad (AJP), ka la pynlong ïa ka jingïakhih hakhmat ka ophis treikam jong ka bank ha Panbazar ha Guwahati ha ka sngi Ba-ar (25) tarik u Lber.
Ha kane ka jingïakhih ba la ïalam da u General Secretary u Chandrapal Baruah, u Iftikar Hussain, u Ankur Gogoi, u Vice President u Durlav Talukdar bad ka nongaiktien ka Ananya Saikia, ka la sakhi ïa ka jingïashim bynta na palat shispah ngut ki samla kiba dawa ïa ka jingtohkit kaba hakhliehduh bad ban leh da kaba tyngeh ïa kito kiba donkti halor kane ka kam bymman.
Ki nongïakhih ki la kynnoh ïa ka sorkar jylla ba ka la kah matlah ïa ka jingbamsap hapoh ka bank, wat la ki don ki sakhi kiba shai bha jong ka jingleh bymhok ha ka liang ka pisa tyngka.
Ki la mih ki jingpyrta da ki kyntien kiba pyrshah ïa ka kynhun nongpynïaid jong ka bank, kynthup ïa u Chairman jong ka, u Biswajit Phukan (MLA) bad u Managing Director u Dombaru Saikia, kiba shah kynnoh ba ki la wanrah ïa kine ki kam sniew ha ka liang ka pisa tyngka na ka bynta ban ïoh jingmyntoi shimet.
Katkum ka kopi jong ka jingujor ha ka 30 tarik u Kyllalyngkot, 2025, kaba la pynphriang ha ka por ba pynlong ïa ka jingïakhih da ka seng samla, kaba la phah sha ka Central Vigilance Commission, ka bank ka la treikam khlem ka jingïateh kular kaba pura bad uno uno u nongdie IT naduh u bnai Jylliew, 2024, wat hapdeng ka jingkut noh ki jingïateh kular ba la dep.
Kane ka la wanrah ïa ka jingsngewkhia halor ka jingpyntreikam bad buh jingma ïa ha jingshngaiñ jong ki nongbuh pisa ne ki trai jong ki Account ha kane ka bank.
Ki jingkynnoh ki kynthup ruh ïa ka jingpynkiew dor kaba jur bad khlem nongrim ïa ki jingïateh kular ban tei ïa ki bank na ka T.28 klur ha u snem 2018 sha ka T.50 klur ha u snem 2025, ha kaba T.14 klur la kynnoh ba la pynpoi sha ka KPMG ha kaba la mih kiba bun ki jingkylli.
Kaba pynjur shuh shuh ïa kane ka kam, ka Cooperation Department jong ka sorkar Assam ka la shim khia ïa kine ki jingkynnoh. Ha ka jingpynbna ba la pynmih ha ka 3 tarik u Lber, 2025, ka tnad ka la bthah ïa u Registrar jong ka Cooperative Societies, Assam, ban tohkit tohkit halor ka jingkynnoh bad ban aiti ïa ka kaiphot hapoh 15 sngi.
Kane ka jingleh, pynban, kam shym la lah ban pynjem mynsiem ïa ki nongïakhih, kiba kynthoh ba ka jingbym leh ei ei jong ka sorkar haduh mynta ka pyni ba ka pyrshang ban ïada ïa kito kiba donkti. Haba kren ha ka jingïakhih, ki nongïalam ka kynhun ki samla jong ka AJP ki la maham ïa ki jingïakhih kiba kham heh lada ym shim khia mardor ban pynngat ïa kiba donkti.
“Ka lawei ha ka liang ka pisa tyngka jong ki nongbat Account bym lah kheiñ ka don ha ka jingma, hynrei ka sorkar ka dang sngap jar.Ngi dawa ïa ka jingtohkit kaba khlem shah liang bad ka jingpynshitom kaba tyngeh ïa kito kiba la shet kylla ïa ka jingshaniah jong ki paidbah” ong u Chandrapal Baruah, General Secretary ka seng.
Ka Assam Cooperative Apex Bank Ltd. ka dei ka jaka ai pisa kaba kongsan ha ka jylla, bad ki jingkynnoh ki la pynmih ïa ka jingsngewkhia kaba jur hapdeng ki nongbat Account bad ki nongshong shnong kumjuh.
Naba ka jingkyrshan ka la long na baroh ki kynhun, baroh ki la phai khmat sha ka sorkar na ka bynta ka rai bad ka jingpyntreikam ka ban sa wan na ka bynta ban ïakren halor kane ka bynta.
