Jowai, Lber 27
Ka MDC jong ka VPP na Narpuh, Kong Deivipaya Tongper ka la pynpaw ïa ka jingsngewkhia halor ka jingpyni bym pyrwa jong ka Executive Committee (EC) ka JHADC halor ka mat ban pyntreikam noh ïa ka rel ne railway ha Rilum Jaiñtia.
Ka Kong Tongper ka la pynpaw ïa katei ka jingsngewkhia halor ka jubab ba la ïoh na u Chief Executive Member jong ka JHADC u Ma Thombor Shiwat halor ka jingkylli jong ka ha kynta jingkylli bad jubab ha ka dorbar mang tyngka jong ka JHADC kaba la long ha ka 27 tarik Lber.
Haba jubab ïa ka jingkylli jong ka Kong Tongper, u Ma Shiwat u la ong ba haduh mynta ka council kam pat shym la ai kano-kano ka NOC ne jingbit ïa kano-kano ka kompeni ne kynhun treikam na ka bynta ban leh ïa ka survey na ka bynta ka lynti ïaid ka rel ha Rilum Jaiñtia.
Ka Kong Tongper ka la kylli hato ka Executive Committee kan kyntait ne pdiang ïa ka rel ha Rilum Jaiñtia bad na ka liang jong u Ma Shiwat u la jubab ba kin sa peit da la poi kata por bad kane ka jubab jong u Ma Shiwat ka la pynbitar shipor ïa ka Kong Tongper.
Ha kawei pat ka liang, u Executive Member jong ka JHADC u Ma Jesse Suiam u la ïathuh ba ki don haduh 5926 ngut ki nongtrei bar jylla kiba la ïoh ïa ka Non-Tribal Employees Service License na ka council naduh ka 1 tarik u bnai Ïaïong 2022 haduh 28 tarik u bnai Rymphang 2025 haba jubab ïa ka jingkylli ba la wanrah da u MDC ka VPP na Muthlong Sohkymphor u Ma S Lapasam.
U MDC ka VPP u la kylli balei la shu thoh tang nongtrei bylla ne labour bad nongtrei ne employee khlem da thoh shai ïa ka jait kam ha kita ki labour laisen. Halor kane ka jingkylli u Ma Shiwat u la jubab da kaba kubur ba ka don ka jingduna ha katei ka labour laisen bad u la kular ba nangne shakhmat yn sa thoh shai noh ïa ka jait kam ba ki trei ki nongtrei bar jylla ha ki labour laisen.
Haba jubab ïa ka jingkylli jong u Ma Lapasam halor ka jingïoh bhah jong ka council na ka 15th Finance Commission ha u snem 2023-24 bad 2024-25, u Deputy Chief Executive Member u Ma Lasky Rymbai u la ïathuh ha u bnai Nohprah 2024 ka council ka la ïoh pdiang ïa ka pisa ba 4.05 klur tyngka kum ka first installment jong ka Untied Grant 2021-22. U Ma Lapasam u la kylli kumno hato la sam lut sha baroh ki MDC bad halor kane ka jingkylli, u Ma Rymbai u la jubab ba la sam ïa katei ka pisa sha baroh ki MDC jong ka JHADC.
Mar sien ïoh ïa katei ka jubab, u MDC ka VPP na Jowai North u Ma Awhai Andrew Shullai u la ïeng bad pynpaw ïa ka jingbitar ba kum u MDC barim jong ka council um shym la ïoh bhah satia namar la shu sam sop-sop ïa katei ka skhim bad u la buh jingkylli hato mynta u snem yn sam sop sop ne yn sam ïa baroh ki MDC jong ka Council. U Ma Rymbai u la jubab ba yn sam ïa baroh ki MDC bad katkum ka projek ba kin phah sha ka Council.
Haba jubab ïa ka jingkylli jong u MDC ka VPP na Mukhla Ummulong u Ma N Lamare halor ka tulop ba dang sah ban siew ïa ki nongtrei bad MDC jong ka JHADC, u Ma Shiwat u la ïathuh ba ka tulop kaba dang sah ban siew ka poi haduh 51 klur tyngka.
U MDC jong ka VPP na Muthlong Sohkymphor u la kylli katno tylli ki skul District Council Lower Primary School (DCLPS) ki don baroh bad hato kine baroh ki skul ki don ïa ka ïing skul jong la jong, ki biang ka painkhana bad umdih bad hato ka jingdon jong ki nonghikai ki long ne em katkum ka kyndon jong Rights to Education Act kata iwei nonghikai na bynta 30 ngut ki khynnah pule ne ki don ki skul kiba bun khynnah bad duna nonghikai ne bun nonghikai bad duna khynnah.
Haba jubab ïa katei ka jingkylli jong u Ma Lapasam, ka Executive Member Kong Violet Lyngdoh ka la ïathuh ba ki don haduh 101 tylli ki DCLPS bad na kitei 51 tylli ki don la ki ïing skul katba 49 tylli ki long ki skul ha ki Dorbar Hall bad ka la ïathuh shuh shuh ba baroh ki skul ki biang ki jingdonkam na bynta ki nonghikai bad khynnah. Ka Kong Lyngdoh ka la kular ban shim ïa ki lad ki lynti ban nang pynbha ïa ki DCLPS.
