Shillong, Lber 27
U Myntri ba khmih ïa ka tnat Bording ha ka Jylla, AT Mondal u la pynpaw ba ki la don shibun ki jingïapher mynta ha ka tnat Bording ka Jylla ha kaba ki paidbah ka Jylla ki ju mad ïa ka jingpynlip bording ba 7-9 kynta shisngi haduh u snem 2023, hynrei mynta ka Jylla ka la lait na ka jingpynlip bording ba khah-khah.
U Myntri u la ong ba wat la kam don shuh ka jingpynlip bording ba bun kynta ha ka shisngi, hynrei kin don ki por ba ki paidbah kin hap mad ïa ka jingpynlip bording na ka MePDCL haba don ka jingpynbha maramot bad pyntrei ïa ka Revamped Distribution Sector Scheme (RDSS) kaba dang ïaid mynta.
Haba ai jingïaroh ïa u Myntri Rangbah, Conrad K Sangma, u Mondal u la ong ba u la ïoh ka jingkyrshan kaba radbah na u Myntri Rangbah ka Jylla ban pynjanai ïa ka rukom treikam jong ka Meghalaya Energy Corporation Limited (MeECL) bad kumjuh ruh ïa ka jingpynmih bording hapoh ka Jylla.
“Nga la ïoh ka jingkyrshan ba radbah na u Myntri Rangbah. Ngam ju poi pyrkhat ba un ai ka jingkyrshan haduh katne u pud, na kata ka daw ngi la ïatreilang ban ïohi ïa ka jingtreikam kaba janai jong ka MeECL bad pynjanai ruh ïa ka jingsam bording. Haba don kino-kino ki jingduna, ngi ju pynbeit ïa ki” la ong u Mondal haba kren bad ki lad pathai khubor ha ka Sngi Palei.
