Shillong, Lber 27
Ki nongïalehkai ïalympat jong ka ri India ki la pynneh ïa la ka jingïalehkai ba itynnad ha ka sngi kaba ar jong ka Senior Asian Wrestling Championship 2025 kaba la long ha Amman, Jordan ha kaba u Nitesh u la khur ïa ka takma rnong kaba ar jong ka India ha ka kyrdan Greco-Roman bad ban ïasoh lang bad u Sunil Kumar uba la khur ïa ka takma rnong ha ka kyrdan 87 kilo jong ki shynrang.
Ha kane ka jingïakhun u Nitesh u la lah ban pynliem noh ïa u Amanberdi Agamammedov jong ka Turkmenistan da 9-0 na ka bynta ban ïohpdiang ïa ka takma rnong.
Une u rangïalehkai ba 22 snem ka rta u la sdang ïa ka jingïaid lynti ha kane ka lympung da kaba pynliem ïa u Ilyas Guchigov ka Kazakhstan da 9-0 kol. Hadien kata u la shah rem noh ha ka jingïakhun semifinal ha u nongïalehkai na Iran u Mohammadhadi Abdollah Saravi ha shwa ba un khur ïa ka takma rnong pyrshah ïa u Agamammedov.
“Da kane ka jingjop, ka kynhun ïalehkai Greco-Roman jong ka India mynta ka la ïoh ban khur ar tylli ki takma rnong ha kane ka lympung, kaba pyni ïa ka jingïalehkai kaba khlaiñ bha ha ka rynsan jong ka pyrthei,” la pynpaw u President ka Wrestling Federation of India (WFI), u Sanjay Singh.
Ha ka Sngi Ba-ar, u Sunil Kumar u la khur ïa ka takma rnong ha ka kyrdan 87 kilo jong ki shynrang da kaba pynliem ïa u nongïalehkai ka China u Jiaxin Huang da 5-1 lyngba ka Victory by Points. Ha kiwei pat ki jingïakhun, ka Nitin ka la shah rem noh ha ka jingïalehkai 55 kilo jong ki shynrang na ka North Korea da 9-0 kol, katba u Sagar Thakran u la shah rem ha u nongïalehkai jong ka Jordan u Amro Abed Alfattah Jamal Sadeh ha ka quarterfinal jong ki shynrang kaba 77 kilo.
Katba ka jingïalehkai jong ki kynthei ka dang jam shaphrang ha ki san tylli ki kyrdan ïalehkai. Ki nongmihkhmat jong ka India ki kynthup ïa ka Antim Panghal kaba la khur takma ha ka World Championship ryngkat ka Neha, Muskan, Monika, Mansi Lathar, Jyoti Berwal, bad ka Reetika.
