Jowai, Lber 27
Ka Dr Norman Tunnel Hospital ha ka miet 26 tarik Lber ka la jop ha ka ban sei ïa u pin uba la tip kum u ‘push pin’ na ka tor jong uwei u khynnah ba dang 14 snem ka rta.
Kane ka jingjop kane ka hospital ka long ka sienjam kaba ai jingkyrmen ïa ki nongpang wat hapdeng ka jingbym don ki tiar kiba biang, hynrei ka jingtbit bad jingshemphang jong ki doktor bad nurse kane ka hospital ban pyndonkam da ki tiar katba ki don ei ha kane ka hospital ki la lah ha ka ban sei ïa une u pin.
La khlieh ïa kane ka jingsumar ïa une u khynnah da u Dr. Benne bad Dr. Chilling, ka kynhun ki doktor anesthesia kaba lam khmat da u Dr. Ritchie bad Dr. Jonathan bad da ka jingïarap u doktor khynnah ne pediatrician u Dr. Ritchie bad u Dr. Prince bad ka Dr D. Nongpluh Medical Superintendent jong ka Dr. Norman Tunnel Hospital kaba la ai mynsiem borbah halor kane ka jingsumar ki la jop ban sei ïa une u pin uba la sah kut ha u tor na ka liang ka mon.
Une u khynnah uba shah sumar dei na kawei ka shnong kaba hap hapoh ka Thadlaskeiñ Block.
Une u khynnah u la kum nguid ïa une u pin ha ka 25 tarik Lber bad la pynkit ïa u nyngkong ha Ummulong CHC, bad la phah mar dor sha Civil Hospital, Ïalong nangta la pynkynriah sha Woodland WK Hospital bad haba kut u la poi sha Dr Norman Tunnel Hospital ban ïoh ïa kane ka jingsumar.
Ka Medical Superintendent ka la ïathuh ba kane ka jingjia ka dei ka bym ju jia koit, namar ba bunsien la lap ba rung na u pipe bam, hynrei mynta ka kynti une u pin la lap ha u tor kaba la ktah ïa ka rukom ring mynsiem jong une u khynnah.
