Shillong, Lber 27
Ka Sorkar Jylla ka la peitngor bha ïa ka jinglong jingman jong ka pung Umïam (Dam), da kaba shim ruh ïa ki sienjam ban pynthikna ba ka Dam pung Umïam kan don ha ka jingshngaiñ.
Haba kren bad ki lad pathai khubor ha ka Sngi Palei, u Myntri ba khmih ïa ka tnat Bording, Abu Taher Mondal u la ong ba ka tnat MeECL bad MePDCL ki kham sngewkhia eh halor ka jinglong jingman jong ka dam, hynrei hadien ba la dep trei maramot lyngba ka Dam Rehabilitation and Improvement Project (DRIP), ka jingkhuslai ka la kham duna bad la kham sngew shngaiñ.
U la ong ba ka Sorkar ka la pyrkhing ruh ïa ka jingïaid ki kali heh bad khia, da kaba buh hakhmat eh ïa ka jingshngaiñ jong ka Dam.
Na ka liang u Myntri u la pynpaw ruh ka jingsngewkhia ha kaba ïadei bad ka rta jong ka Dam, ha kaba u la ong, “Mynta ka jingkylli ka long ba kaei ka ban jia hadien habud hadien ba la kut noh ka rta jong ka Dam. Kane ka dei ka kam kaba eh bha namar ka Dam Umïam ka pynlang um na ka bynta 216 Megawatt ïa ki 4 Unit ba dei jong ka Umïam, bad ruh ka Umtru Power Project ba thymmai hajan Byrnihat baroh ka um ka dei kaba pyllait bad leit na Umïam beit”.
U Mondal u la ïathuh ba ka tnat ka la ïakren halor jong kane, hynrei ïa mynta ym pat shim ïa kano-kano ka rai.
“Ngi kyrmen ba kan sa don biang ka jingïakren bad jingïasyllok shuh-shuh halor kane ka bynta. Ka technology ruh ka kylla stet bha, lehse kan sa don kano-kano ka technology kaba lah ban pynjlan ïa ka rta jong ka Dam. Hynrei wat la katta, ngi don ka jingsngewkhia”, u la ong.
“Ngi peit pyrman bha mynta ha jingkieng Dam, ki briew jong ngi ki don hangthie bad ngi la buh ruh ïa ki pulit ha katei ka jaka ban pynthikna ba ka jingshngaiñ kan don beit ïa ka jingkieng”, la bynrap u Myntri.
Ha kajuh ka por, u Mondal u pyntip ba ka Sorkar ka la bynshet ha ka National Highways & Infrastructure Development Corporation Limited (NHIDCL) ba kan pynkhreh ïa ka Detailed Project Report (DPR) na ka bynta ban shna da kawei pat ka surok ban pynïaid kali.
“Nga tharai ki kam ki la ïaid bad ngin sa ïoh ïa ka surok bypass, namar ka long kaba donkam bha ruh khamtam ba ka jingkieng ka dei kaba la tei bad plie naduh u snem 1965. Ïa ka jingkieng la shna bad pynwandur katkum ha kato ka por, kaba u pud ba la buh ïa ki kali kit jingkit ka long kaba duna. Mynta bun ki kali ki kit jingkit kiba jubor ka jingkhia, ngi la donkam da kawei pat ka jingkieng ka ban lah kyrda ïa ka jingkhia ba bun jait”, la ong u Mondal.
