Shillong, Lber 27
Ka ïingbishar Special Judge (POCSO) ka East Khasi Hills, ka la rai pynrem ïa ar ngut ki briew halor ka jingdonkti ban leh be-ijot ïa ki khynnah kynthei hapoh ka district.
Kine ar ngut ki briew kiba la shah rai pynrem ki dei kiba la tip kyrteng kum u Maitshaphrang Kharmawlong bad u Demonstar Kharbani, kiba la shah kem halor ka jingthombor ïa ka longrynïeng ki khynnah kynthei ha la ki jong ki shnong.
U Maitshaphrang Kharmawlong, uba la shah kem ha ki pulit ka thanat Rynjah, Shillong, u la ngat ha ka jingshah pynshitom da kaba yn shah set patok haduh 12 snem kynthih katkum ka jingpynsaja hapoh ka kyndon 6 jong ka POCSO Act nalor ka jingshah daiñ kuna ba T.10,000 lym kumta un hap ban shong patok sa 2 bnai lada ym lah siew.
Nalor kane, une u briew u la ngat ruh ha ka jingpynsaja ba 3 snem ha patok bad ka kuna ba T.5000 ne shong patok 1 bnai halor ka kyndon 506 IPC.
Ïa kane ka mukotduma la tohkit da u Bah Raymond Kurkalang uba bat mynta kum u Officer In-charge ka thanat Mawngap.
Ha kawei pat ka jingjia, ka ïingbishar ka la hukum ban set patok 3 snem bad ka kuna ba T.3000 ne shong patok shibnai ïa u Demonstar Kharbani uba shah kem halor ka case jong ki pulit ka thanat Rynjah ba la pynngat hapoh ka kyndon 8 jong ka POCSO Act.
Ïa kane ka mukotduma la tohkit da ka Women Police Inspector Lily D Sangma kaba bat mynta kum ka 2nd O/C ka thanat Sadar.
