Shillong, Lber 28:
Ar ngut ki nongmihkhmat kiba la kham slem kiba la jied da ki paidbah, Bah Titos Chyne kum MDC ka UDP na Sohra bad Kong Grace Mary Kharpuri kum MDC ka NPP na Nongshken constituency ki la pynpaw ka jingsngewkhia halor ka jinghiar dor ïa ki briew kiba ai jingkynthoh ha youtube namar kim burom shuh ïa ki nongmihkhmat ba la jied da u paidbah.
Kine ar ngut ki MDC ki la pynpaw haba shimbynta ha ka jingïakren kyllum ïa ka mang tyngka ba lai bnai ba la wanrah da ka Executive Committee kaba la mynjur noh ha ka Sngi Thohdieng ha dorbar kaba khatduh.
Hadien ba u Bah Titos Chyne u la dep kdew ïa ka jingmang pisa ha ki tnat treikam bapher bapher, u la kren ruh ïa ka jinghiar ha ka jinglongbriew khamtam ka akor namar bun ki briew kim kwah shuh ban peit youtube namar ka la hiar dor kiba kynthoh namar la shu kynthoh pathar wat ïa ki longkmie.
Haba shim bynta lang ïa ka jingmang pisa, ka Kong Grace Mary Kharpuri ruh ka la ong ba ym pat ju jia koit ba kiba ai jingkynthoh ka la long kaba hiar dor namar ka jaidbynriew tipbriew tipblei kaba tip ïa ka akor ka la jah noh.
Ka la ong biang ba ka jingwanrah ïa ka jingkylli ban pynlong biang ïa ka monolith festival ha kine ki sngi ka long ban pynneh pynsah ïa ka dustur riti ym ban shu leit leh kmen.
Na ka liang u Executive Member ba dei peit ïa ka tnat pla tyngka, Bah Seibor Warbah, u la pyntip ba ki MDC ka Voice of the People Party ki dang shimti ïa ka Executive Committee kaba la ïaid tang shi bnai, kumta ka donkam ïa ki ban dang bishar bniah na bynta ban pynïaid beit ïa ki kam jong ka council.
Kane ka jingpyntip u Bah Seibor ka dei haba jubab ïa ka jingkren kyllum ki MDC ka liang pyrshah kiba ïashimbynta ha ka mang tyngka kaba lai bnai ba la wanrah da ka Executive Committee ha ka sngi sdang jong ka dorbar kaba la mynjur pat mynta ka sngi.
U Bah Seibor u la ong haba la shimti ïa ka Executive Committee ynda ki la shong pyrkhat ki la sngewdei ban wanrah da ka mang tyngka kaba lai bnai.
Ha kane ka jingïakren kyllum ïa ka mang tyngka la shimbynta da u nongïalam ka liang pyrshah Bah Titos Chyne, Kong Grace Mary Kharpuri, Kong Rona Khymdeit, Bah Ricky Shullai, Bah Sraly Rashir, Bah Lurshai Kharbani, Bah Synshar Kupar Lyngdoh Thabah, Bah Alvin Sawkmie bad Bah Pius Marweiñ.
