Shillong, Lber 28
Ka North-Eastern Hill University Teachers’ Association (NEHUTA) ka la dawa ïa ar ngut ki Professor, kita ka Prof. S. M. Sungoh bad ka Prof. Fameline K. Marak ba kin iehnoh kam mardor kum ki Pro Vice-Chancellor jong ka Skulbah ka North-Eastern Hill University (NEHU) ha Shillong bad ha Tura da kaba kynnoh ba kane ka jingthung kam ka long kaba be-aiñ bad kaba pynkheiñ ïa ki aiñ jong ka NEHU bad ki kyndon jong ka Sorkar.
Ka NEHUTA ha ka jingïalang kaba la long ha ka 25 tarik u Lber, 2025 ka la pynpaw ïa ka jingsngewkhia kaba khraw halor ka jinglong-jingman kaba mynta ha kaba ym don Vice-Chancellor ha ka jaka pule ban peit ïa ki kam jong ka skulbah naduh ka 6 tarik u Lber 2025.
Ha ka shithi ba la phah sha baroh ar ngut ki Pro VC ha ka Sngi Thohdieng, ka NEHUTA ka la ong ba ka la kyntait war ïa ki jingshah thung kam jong ki ha u Naiwieng 2024 ba la leh da u Prof. P.S Shukla, Vice Chancellor ka NEHU, namar ka jingkynnoh ba ki la pynkheiñ ïa ki rukom treikam kumba la buh hapoh ka NEHU Statute 3.
La ong ba u Prof. Shukla bad u Registrar Col. Omkar Singh (Retd.) ki don ha ka shuti ha ka por ba thungkam, bad pynskhem ba ki kam ba la leh da kitei ki heh ha ka por ba kim don ha ka ophis treikam jong ka NEHU, ki long ki bym don jingmyntoi, kumba la pynbna da u Acting Vice-Chancellor barim, Prof N. Saha.
“Ka jingleh jong u Prof. Shukla bad u Omkar Singh haba ki don ha ka shuti bad bym don ha NEHU, Shillong, ka la pynlong ïa ka jingduh jingmyntoi bad kaba thylli ïa kaba la pynbna da u Vice Chancellor (Acting) ha ka 23 tarik u Naiwieng 2024”, ong ka NEHUTA.
Ka NEHUTA ka la pynrem jur ïa ka jingthung bad ïasoh jong baroh ar ngut kum ki Pro VC kita ka Prof. S. M. Sungoh ha Shillong bad ka Prof. Fameline K. Marak ha Tura namar ba ka dei ka jingleh be-aiñ jong u Prof. Shukla.
“Ka NEHUTA ka la kyntait beit ïa kine ki jingthungkam ha u Naiweing 2024 bad naduh katei ka por ym shym la don kano-kano ka jingkylla bad ngi kyntait beit ïa ka mynta ruh,” ong u president ka NEHUTA u Prof. Lakhon Kma ha ka shithi.
Ka seng ka la kdew ba u Prof. Shukla u la jah na ka jaka pule jong ka nongbah Shillong naduh ka 15 tarik u Naiwieng 2024, kaba u la pynjlan haduh ka 2 tarik u bnai Lber 2025 bad haduh mynta um pat bteng wat hadien ka shuti, kaba la long haduh 133 sngi lynter ka jingshim shuti jong u.
Shuh-shuh, ka la ong ba ïa ka kaiphod jong ka Inquiry Committee halor ka jingleh jong u Prof. Shukla ym shym la pynbna paidbah da ka tnad pule puthi ka Sorkar Pdeng bad kumta ym shym la pyllait ïa u na ki jingshah kynnoh pyrshah ïa u.
“Kaei kaba kham pynsngewsih ba katba baroh ki nongshim bynta ki la pyrshah ïa ka jingbteng jong u Prof. Shukla ha ka kam VC, bad kumjuh ruh u MP ka Meghalaya, u Dr. Ricky A. J Syngkon u la rah ïa kane ka ishu ban weng ïa u VC wat ha Parliament ruh, hynrei phi kyrshan ïa u Shukla bad ka jingpynlong aiñ ïa ki kam be-aiñ jong u, ki jingpynkheiñ ïa ka aiñ & ki kyndon jong ka NEHU, bad ki rukom treikam ka Sorkar jong ka ri India bad ki jinglong pyrshah riewlum bad pyrshah ïa ka Meghalaya jong u kiba u la pynpaw pyrthei ha ka por ba u bat kam”, ong ka shithi.
Ka NEHUTA ka la kdew ba ka kyndon jong ka tnad pule puthi ka khanglad ïa ka jingthung ïa ki briew ha ki kam ba la buh da ka aiñ hapoh lai bnai hadien ba ki la shongthait, ka kyndon kaba ka la kam ba ka treikam ïa u Prof. Sungoh, uba la thmu ban shongthait ha ka 31 tarik u Jymmang 2025.
“Ngi kwah ban pyntip ba ngim ithuh ïa kum kane ka jingthung beaiñ ïa ki Pro VC ha Shillong bad ha Tura Campus jong ka NEHU kiba la leh da kaba pynkheiñ ïa ka aiñ bad ki kyndon jong ka NEHU; bad ki kyndon bad ki rukom treikam jong ka ri India. Ka long ruh kaba donkam ban pyntip sha ka Prof. Sungoh ba ki don ki jingbthah ba la pynmih da ka tnad pule puthi na ka por sha ka por ka por, kiba don bad ka skulbah, ki bym shah ïa u briew ban bat ïa ka kam lai bnai shwa ban shongthait bad phi shongthait ha ka 31 tarik u Jymmang 2025. Kijuh ki kyndon la pyndonkam da ka skulbah ryngkat bad u Prof. Saha kum u Acting VC dang shen ha u bnai Kyllalyngkot 2025 na ka bynta ka case ba la buh kumjuh”, ong u Prof. Kma.
Namar kata, na ka liang ka NEHUTA ka la kyrpad ïa kitei ar ngut ki Professor ban iehnoh kam mar-mar dalade na ka kam beaiñ jong ki kum ki Pro VC, bad bynrap ba hadien kata, ka synjuk kan sa shim da kawei pat ka rai katkum ka jubab kaba mih na kane.
