Shillong, Lber 28
Ka Shillong Lajong FC kan ïalehkai biang ha ka lympung I-League ka ban long ha la ïing pyrshah ïa ka kynhun na kajuh ka thaiñ na shatei lammihngi jong ka ri India na Mizoram, ka Aizawl FC ha ka por 7 baje janmiet jong ka sngi Saitjaiñ, 29 tarik Lber 2025 ha madan SSA Stadium, Shillong. Ka Lajong kan shim bynta ha kane ka jingïalehkai ha la ïing kaba la kham slem na ki hynriew tylli ki jingïalehkai kiba la long shabar na la ïing.
Ka Lajong mynta ka don ha ka kyrdan ba hynniew ryngkat 26 poiñ na 20 tylli ki jingïalehkai, katba ka Aizawl FC kaba dang ïakhun bad don ha ka kyrdan ba khatwei ryngkat 19 poiñ na 20 tylli ki jingïalehkai.
Ka sien khatduh ba kine ki arliang mamla ki la ïakynduh ka la kut noh da ka jingjop kaba 3-1 kol ha ka liang ka Lajong haba ki la ïakhun ha u bnai Kyllalyngkot ha Aizawl. Ka Lajong kan peit ban khie biang da ka jingjop bad khmih lynti ban kyntiew shuh-shuh ïa ki poiñ ha ka miej kheiñ poiñ bad ban kynjoh kham shalor katba lah, katba na ka bynta ka Aizawl kane ka dei ka jingïalehkai kaba dei ban jop namar ba ka khmih lynti ban lait na ka jingshah pynhap poiñ.
Ïa kane ka jingïalehkai yn pyni ‘live’ lyngba ka Sony Sports Channel, ka SSEN mobile app bad ka ssen.co website.
