Khliehriat, Lber 28
Ka MLA ka Sutnga Saipung, Kong Santa Mary Shylla ryngkat u Deputy Commissioner ka East Jaiñtia Hills District, Shivansh Awasthi, u Superintendent of Police, Giri Prasad, u Project Director ka NHAI, ki nongbylla bad kiwei-kiwei ki heh Sorkar ha ka 27 tarik Lber ki la jurip ïa ka surokbah NH-06 kaba ka jingshna ka dang ïaid shakhmat.
Shwa ka jingleit jurip, ka la don ka jingïalang ha ophis jong u Deputy Commissioner ha ka jingdonlang ka Kong Santa Mary Shylla ryngkat bad kiwei-kiwei ki heh jong ka NHAI kiba la ïathuh ba ka jingïaid ka kam ka long kumba 65% ha kaba ïa kaba dang sah la khmih lynti ban lah pyndep hapoh 2 bnai.
U Deputy Commissioner ka East Jaiñtia Hills District, Shivansh Awasthi u la pyntip ba ki bor pynïaid distrik ki dang ïai bteng ban ïakynduh bad ka NHAI ha kaba ïadei bad ki kam kiba dang ïaid shakhmat bad la khang ban rung ki kali heh naduh ka por 9 baje mynstep haduh ka por 5 baje janmiet katkum ka jingkyrpad jong ka NHAI khnang ban lah pyndep ïa ki kam.
Hynrei ka jingïaid ki kam sha Sonapur, Kuliang, Umkiang bad ha Ratacherra ka dang suki bha, la ïathuh u DC bad pyntip ruh ba la bthah ïa ka NHAI ba kan shim ïa ki sienjam kiba biang kynthup ban pynpoi shuh-shuh ïa ki briew bad ki mashin ban pynsted ïa ka kam.
U Superintendent of Police ka East Jaiñtia Hills District, Giri Prasad, u la pynpaw ïa ki jaka kiba kongsan ha kaba ka jingthut jong ki kali ka wanrah ïa ka jingdheng kali bad u la kyrpad ïa ka NHAI ban shim ïa kine ki jaka ha ka rukom kaba kongsan bad pyndep ïa ka kam ha ki artaïew ban wan.
Ka MLA ka Sutnga-Saipung Konstitwensi, ka Kong Santa Mary Shylla ka la pynpaw ka jingsngewkhia ha kaba ïadei bad ka jingslem ban ïaid ki kam sha lyndet ka Sonapur.
“Nga la jurip ïa ka surok NH6 baroh kawei naduh Khliehriat sha Malidor ryngkat bad ki heh ka NHAI kumjuh ki heh jong ka distrik, bad nga sngewkhia ïa ka jingslem jong ki kam jong ka jingtrei maramot. Nga sngewthuh ïa ka jingeh jong ki nongshong shnong, ki nongleit nongwan kiba hap ban shah ïa ka pum-pum, ka jingthut ha ka leit ka wan namar ka jinglong-jingman jong ka surok. Ngan sa rah ïa kane sha ki bor ba halor bad ngi la bthah ïa ka NHAI ban pyntikna ban pyndep ïa ki kam maramot shwa ban sdang u slap.”, la ong ka Kong Santa.
Kiwei pat kiba la don ha ka jingleit jurip ki long ki nongïalam shnong Umkiang bad ki nongshong shnong kiba la kyrpad ïa ka NHAI ban pynkloi ïa kane ka kam bad kyntu ïa ki bor pynïaid distrik ban pyntikna ba kan ïai bteng ban buddien.
