Jowai, Lber 28
Ka ‘Resolution’ ba la wanrah da u nongïalam ka liang pyrshah bad u MDC ka Jowai-North ha JHADC, Bah Awhai Andrew Shullai halor ka rukom treikam jong ka tnad khlaw ka la liem noh da ka ‘Voice Vote’ ne ka jingrah kti ha ka Dorbar Mang Tyngka kaba la poi sha kaba kut ha ka 28 tarik Lber.
U Bah Andrew u la rah ïa kane ka mat ïakren ne ka ‘Resolution’ ka long halor ka jingshah kynnoh ka tnad khlaw ka JHADC ka ïaid lait shaba palat halor ka rukom treikam, kaba ka tnad kam khlaw ka la klet ïa ka kamram ban ïada ïa ki khlaw ki btap bad ki marpoh khyndew hapoh u pud u sam ka JHADC.
Ha ka jaka ban pyndep ïa la ka kamram, u la kynnoh ba kane ka tnad ka la ai wai ïa ki ‘beat office’ sha ki ‘riew shimet and ki daiñ kuna khlem ka jingtip ïa ki aiñ ki kyndon jong ka Forest Act bad leh bym suitñiew ïa ka bor bad ka iktiar jong ka tnad khlaw kaba la wanrah ïa ka jingkhaïi be-aiñ ïa ki mar khlaw bad pynjulor ïa ka sawdong sawkun ka mariang.
U la pynrem jur ïa ka rukom treikam ka tnad khlaw bad dawa ban tohkit halor ka jingbym larkam ka jingtreikam kane ka tnad. U la ong ruh ba ka JHADC ka dei ban thaw ïa ka komiti halor ki kam be-aiñ ban bishar ïa ka kam tih mar poh khydew be-aiñ, pom dieng bad jingshalan be-aiñ ïa ki mar khlaw.
U la ong ruh ba ka dei ban shim ïa ki sienjam ban pyntreikam ïa ki aiñ Forest Act bad kiwei-kiwei ki kyndon bad ban pynshitom ïa ki ophisar kiba lehklet ïa la ka kamram. U la ong ruh ba dei ban jurip man ka por bad dei ruh ban shimkhia ïa ki jingeh ki paidbah.
U CEM Thombor Shiwat haba pynshai u la ong ba ki ai aiwai ïa ki ‘beat office’ ka dei hadien ba la lap ba hiar palat ka jingïoh khajna ka JHADC.
U la kdew ruh ba na ki lai tylli ki ‘Beat Office’, kita ka Ratacherra, Mookyndur bad ka Garampani ha ka shi snem ki la ïoh lum tang T.10 lak tam, pynban haba ki ai wai ki ïoh T.50 lak shisnem.
U la pynpaw ruh ba ka dei ka EC kaba shim rai ban ai wai hadien ba la lap ïa kane, bad u la ong ruh ba ka Executive Committee kan shimkhia ban shim ïa ki sienjam ban pyntikna ba kine ki nongshim wai kin trei katkum ka kyndon jong ka tnad.
Na ka liang u Rikut N Parien, halor kane ka jingkynnoh thurmur jong ka jingtreikam ka tnad khlaw bad ka jinglum pisa be-aiñ, u la dawa ha ïingdorbar ban pyndam ïa ka jingai wai.
U Andrew haba bteng shuh-shuh u la ong ba kane ka jingthurmur ka tnad khlaw u la ong balei ba ka EC kam ai ïa ki jingpynbna kiba shai ban khot ïa ka ‘Open Tender’ ha ryngkat ki kyndon bad kynnoh ba ka dei ka jingleh sop-sop bad ïaid lait ïa baroh ki kyndon treikam ka tnad kam khlaw.
Ar tylli kiwei pat ki ‘Resolution’ kiba la wanrah da u Bah Andrew ka dei halor ka jingpynïaid ïa ki ïew ki hat hapoh u pud u sam ka JHADC bad ka jingpyllait pathar ïa ki ‘Trading License’ sha ki nongkhaïi bar jylla kaba la ktah kylla ïa ki nongkhaïi trai jylla. Kumta ar tylli kine ki mat ïakren hadien ba la ïatai, u MDC ka VPP u la weng ïa ka ‘Resolution’.
