Jowai, Lber 28
Ki bor pulit ha ka 27 tarik Lber ki la lapdien ïa kawei ka ‘Scooty’ kaba la shah rong tuh ha ki briew ki bym lah ban ithuh na ka jaka ïeng na Raitsisim, Jowai na kawei ka jaka ba long khlaw na ka thaiñ Demthring.
Kane ka la wan jia hadien ba u trai jong kane ka ‘Scooty’ (rong jngum bad ïong) kaba don ïa u nombor ML -04 E-3318 (Yamaha B6), u Thombor Sayoo uba dei na ka shnong Mynska u la leit ban ujor sha thanat ha kaba ïadei bad kane ka jingshah rong tuh kane ka ‘Scooty’ jong u na katei ka jaka ïeng ha ka por kumba 4 baje mynstep.
Hadien ba la ïoh ïa ka jingtip, ki pulit mardor ki la pynlong ka jingthwet kaba jur hynrei kim shym la lapdien satia.
Hynrei, hadien ka jingtohkit bniah da ka kynhun ba kyrpang, ha ka por kumba 3 baje janmiet, kane ka kynhun na Demthring ka la pyntip ba ka don kawei ka ‘Scooty’ kaba don ïa u nombor ML – 04 E – 3318 ba la ieh ha kawei ka jaka ba long khlaw.
Kumta na ka liang ka kynhun ki pulit mardor ki la pynlong ïa ka jingtohkit bad hadien ba ki la wan poi ha katei ka jaka ki la shimti noh ïa kane ka ‘Scooty’ bad pyntikna ba ka dei kaba la shah tuh.
Hadien ka jingpyntikna kaba bniah ïa u trai kumta ruh la aiti noh ïa kane ka ‘Scooty’ sha u trai uba dei hok.
