Shillong, Lber 28
Ka Assam Rifles ka la pynlong ïa ka lympung ïalehkai phutbol jong ki shynrang ka ‘Assam Rifles Sentinels Cup’ ha ka sien kaba lai. Ha kane ka lympung la ïohi ïa ka jingïashim bynta shitrhem na shiphew tylli ki kynhun kiba mihkhmat ïa ka jylla Arunachal Pradesh, Nagaland, Mizoram, Meghalaya, Manipur, Tripura bad Assam kynthup na ka Assam Rifles, 164 TA (Naga), bad 165 TA (Assam).
Ïa ka bynta ba nyngkong jong kane ka jingïalehkai la pynlong ha Dimapur, Nagaland. Hadien ka jingïakhun kaba itynnad bha ryngkat bad katto-katne tylli ki jingïalehkai kiba la pynkyndeh ruh ïa ki nongpeitkai, saw tylli ki kynhun, kita ka 165 TA, 164 TA, ka Manipur bad ka kynhun na Assam ki la rung sha ka semi final. Katba ka jingïalehkai phainal ka la long hapdeng ka 165 TA (Assam) bad 164 TA (Naga) ha ka Ssngi Thohdieng 28 Lber 2025, kaba la long ha ka jaka ryngkat ka mariang kaba itynnad jong ka East Khasi Hills ha Laitkor hapoh ka jaka jong ka Assam Rifles ha Shillong.
Kane ka lympung ïalehkai ka la sdang naduh ka 16 tarik Lber 2025 ha Dimapur, da ka jingplie paidbah kaba radbah. Man la ka jingïalehkai ha kane ka lympung la ïashim bynta, ïakhun bad lehkai bha da ka mynsiem ïabeh sha ka thong ka jingjop, kaba la pyni ïa ki jingkiew bad jinghiar ha ki kyrdan jong ki kynhun bad katto-katne ki jingïalehkai kiba la ïakhun tyngeh bad mad ruh ïa ka jingrem. Ki ar tylli kynhun kiba tbit tam ki la ïakhun ban ïoh ïa ka khusnam kaba long da ka song pisa kaba T.3,50,000/-.
Ha ka phainal, ka kynhun na ka 164 TA (Naga) ka la long ka nongjop hadien ka jingïakhun kaba jur bha bad kaba la leit sha ka por ba la pynjlan. Ha kane ka sngi la pynkup burom da u Lt Gen Vikas Lakhera, AVSM, SM Director General ka Assam Rifles. La pynbyrngia ïa ki nongpeitkai da ka jingïalehkai phutbol kaba itynnad bha kaba la pyni da ki nongïalehkai kiba tbit, kiba don ka jingangnud, bad kiba ïalehkai bha na baroh ar tylli ki kynhun.
Ka Assam Rifles kaba sngew sarong ban tip kum ka ‘Paralok jong ka Thaiñ Shatei lam Mihngi, (Friends of the North East)’ ka wanrah da ki jingïalehkai kum ka lad ban pynshlur ïa ki samla ban kiar na ki kam lehnoh bad ki jingdih buaid na ki drok bad ban ithuh ïa ka sap kaba bun ha ka thaiñ shatei lammihngi na ka bynta ka jingroi ha ka lawei. Ka Assam Rifles ka don ruh ka jingïateh soskular (MoU) bad ka Bhaichung Bhutia Football Academy lyngba ka residential Assam Rifles Public School (Sports) jong ka, kaba thmu ban pyndonkam ïa ka sap ïalehkai phutbol jong ka thaiñ Shatei Lammihngi bad ban kyrshan ïa ki jingthmu ka Sorkar India jong ka ‘Khelo India Abhiyan bad Fit India Movement’.
