Jowai, Lber 30
Ka Pynbha VO jong ka shnong Pammanik kaba hap ha Laskeiñ Block ha ka 29 tarik Lber ka la plie ïa ka ïing jong ka Kong Iowanka Pakma kaba dei ka dkhot SHGs jong ka Iahluti SHG.
Ka Kong Iowanka Pakma kaba don 2 ngut ki khun ka sah ha ka ïing trep bad shem jingeh khamtam ha ka por slap. Ka VO hadien ba ka la ïohi ïa kane ka jingeh jong ka Kong Pakma, ka la shim ïa ka sienjam ban ïarap lem ïa kane ka longïing.
Ïa kane ka ïing la shna da ka jinglut jingsep na ka VO ryngkat ka jingnoh synñiang katto-katne ki ‘riew rangbah kaba kot ym duna ïa ka T.105200/.
Lah ban kdew ba kane ka dei ka sien kaba ar ba ka Pynbha VO ka la ïarap bad pynshna ïing ïa ki longïing ba duk. Ka Pynbha VO ka don haduh 44 tylli ki SHG kiba thaw da ka Meghalaya State Rural Livelihood Society (MSRLS, BMMU Laskein Block).
Shwa ka jingaiti ïa ka ïing, ka la don ka jingïalang ba la pynïaid da ka Kong Facility Dhar President VO bad la ïoh ka jingduwai na ka Kong Justmin Amanda Talang kumjuh ka jingkren pdiang na ka Kong Shiioni Talang na ka ling ka VO.
La ïoh ka jingkren lyngkot na u Ma Teibor Talang uba dei u nonghikai, ka Kong Nehipaia Talang, Ma CFS Khonglah na ophis BMMU Laskeiñ bad ka Kong Iowanka Pakam kum ka nongpdiang ïa kane ka ïing.
U kongsan Ma M Suchiang kum Gram Sevak Laskeiñ C&RD Block u la ïaroh ïa ka Pynbha VO na ka bynta ka jingtrei shitom jong ka ban ïarap ïa kane ka longïing kaba don hapdeng ka jingduk bad ki kitbok kitrwiang ruh ban nang trei shitom shuh shuh na bynta ki kam ba bha hapoh ka imlang sahlang.
La ïoh ruh ki jingshad jingrwai ba shim bynta da ki SHG, ka Balang CNI, ki samla ka shnong nalor kiwei bad ïa ka jingïalang la pynwai da ki kyntien khublei na ka Kong M Talang EC member jong ka VO.
