Naypyidaw, Lber:
Ka tnat National Center for Seismology (NCS), ha ka step Sngi Saitjaiñ ka la pyntip ba ka Myanmar ha ka miet Sngi Thohdieng, ka la ioh mad biang sa ia uwei pat u jumai ba don ia ka jingkhlaiñ kumba 4.2 Magnitude eiei ha ka por 11:56 jong katei ka miet.
Katkum ka jingpynbna na ka tnat NCS, la ong ba utei u jumai uba la leit pynkhynñiuh khatduh ia katei ka ri, u don ia ka jingjylliew kaba 10 Km, 22.15 N Lattitude bad 95.41 E Longitude.
Ha ka step Sngi Thohdieng la ong ba ka Myanmar ka la dep shah pynjulor bun na u jumai uba khlain 7.2 Magnitude, uba la Khynñiuh ha ka por kumba 11:50 jong katei ka step Sngi Thohdieng, ha kaba katei ka jingkhynñiuh kaba jur, ka la pynkhiwin ia baroh ki paidbah nongshong shnong jong ka Bangkok bad ia katto katne ki bynta jong ka Thailand. La ong ruh da ki hajar spah- hajar ngut ki briew ki la phet krad na ki iing-mala kiba don ha Bangkok ha katei ka por ba utei u jumai u la khynñiuh tyngeh.
Katkum ki dur bad durkhih ba la saphriang paidbah lei, la iohi ruh ba wat ka um kaba don ha ki pung jngi ruh ka la phaloh kumba thnam ka um namar ka jingjur palat jong utei u jumai ha katei ka step.
Utei u jumai, la ong ba u la don ia ka jingkhlaiñ kaba haduh 7.2 Magnitude, uba ka jingjylliew jong u ka long 10 km bad ba la ioh ban bud rekod haduh kumba 21.93 Lattitude bad 96.07 E Longitude.
Ka NCS ka iathuh ba ka jingkhynñiuh jumai uba 4.9 Magnitude ka la lynshop ia ka Myanmar, da kaba ong ba katei ka dei ka jingkhynñiuh jumai ha ka sien kaba lai hadien u jumai bah uba khlain haduh 7.2 magnitude kaba long ka sien kaba nyngkong eh.
Ka durkhih kaba la ioh ring da ka CNN na Myanmar ka la paw ba ka jingkieng surok kaba iaid lyngba ia ka wah Irrawaddy, kaba iaid lyngba ia ka Mandalay, ka la twa shapoh wah ha ka lyer kaba dap da ka dewbilat bad ka um.
Ki jingkhynñiuh jumai kiba jylliew kum une ki kham shyrkhei ban ïa ki jingkhynñiuh jumai kiba kham jylliew namar ka jingpynmih bor kaba kham bun jong ki kham jan sha ka sla jong ka pyrthei, kaba pynlong ïa ka jingkhih jong ka khyndew kaba khlaiñ bad pynjulor ïa ki jingtei bad ki jingmynsaw haba ïanujor bad ki jingkhynñiuh jumai kiba kham jylliew kiba duh bor katba ki nang ïaid sha ka sla khyndew.
Wat la ka Myanmar ka dei ka ri kaba ju jia ka jingkhynñiuh jumai, hynrei ym pat shym la tyrwa ïa ka ‘map’ jong ka jingma na ka jingkhynñiuh jumai ha ka ri baroh kawei.
Namar ka jingiatyngkhuh hapdeng ki plate jong ka Eurasia bad ka Indo-Australia, ka Myanmar ka dei ka jaka kaba don ka jingma kaba jur bha na ka jingkhie jumai.
