Imphal, Lber:
Ïa ka Armed Forces Special Powers Act (AFSPA) la nang pynjlan shuh shuh ha baroh kawei ka jylla Manipur, lait noh tang ha ki 13 tylli ki jaka ba don ki jaka treikam jong ki pulit, ong ka kyrwoh khubor ba la phah da ka Ministry of Home Affairs (MHA) ha ka Sngi U Blei. Ïa ka AFSPA la pynjlan sha ka Tirap, Changlang, bad Longding distrik ha Arunachal Pradesh bad lai tylli ki jaka treikam jong ki pulit ha ka jylla na ka bynta hynriew bnai, la bynrap ka tnad ba dei khmih.
Lah ban kdew hangne ba ïa ka Manipur la buh hapoh ka jingsynshar jong u President bad ïa ka Assembly la buh hapoh ka jingsangeh treikam ha ka janmiet jong ka 13 tarik, Rymphang, katto katne sngi hadien ba u Myntri Rangbah ka jylla u N Biren Singh u la iehnohkam bad kane ka la wanrah ïa ka jingbym thikna ha ka saiñpyrthei ha kane ka jylla.
