Shillong, Lber 30
U Chief Executive Member (CEM) jong ka Khasi Hills Autonomous District Council (KHADC) Bah Shemborlang Rynjah u la ïathuh ba ka Executive Committee ba la ïalam da ka Voice of the People Party (VPP) kan sa phah ïa ka kyrteng sha ka Sorkar Jylla ba kan thung ïa u MDC shu sieh sha ka KHADC.
Haba U Nongsaiñ Hima u la ïoh ban ïakren bad u Bah Shemborlang hadien ba la wai ka dorbar mang tyngka jong ka KHADC mynta ka 28 tarik Lber, u la ïathuh ba ka seng ka la pynkhreh ban phah noh ïa ka kyrteng sha ka Sorkar Jylla ha kine ki sngi.
Haba kylli ïa ka kyrteng jongno yn phah, u Bah Shemborlang u la ong ba un nym pat ïathuh ïa ka kyrteng hynrei ha kine ki sngi ka EC kan sa phah da ka jingthoh sha ka Sorkar Jylla.
U la ïathuh ba ïa u MDC shu sieh ka Sorkar Jylla ruh ka lah ban tyrwa ïa ka kyrteng bad ka EC ruh kan phah ïa la ka jong ka kyrteng.
Katkum ki khubor ba la ïoh lum ba ka Executive Committee kan sa phah ïa ka kyrteng sha ka Sorkar Jylla ba kan thung ïa u MDC shu sieh hadien ba ka Voice of the People Party Sengkmie kan sa phah ïa ka kyrteng hadien ba ka la dep jied namar ïa ka EC ha KHADC la synshar marwei da ka VPP kaba jop haduh 17 ngut ki MDC.
Ha kine ki snem ba la leit, ïa u MDC ba shu sieh sha ki district council la ju phah beit ïa u briew jong kano-kano ka seng saiñpyrthei kaba bat ïa ka bor synshar ha ka Sorkar.
Kum ban shu pynkynmaw ha u snem 2019 ka Sorkar Jylla kaba la ïalam da ka NPP bad UDP ka la thung ïa u Bah Bindo M Lanong kum u MDC shu sieh uba dei u nongkitkam jong ka UDP namar ha kito ki snem ïa ka Executive Committee la bat da ka UDP ha KHADC.
