Shillong, Lber 31
Ka Alumni Committee, ka Parent-Teacher Com-mittee, ka Community Outreach and Social Ex-tension Committee bad ka IQAC jong ka Sankar -dev College, Shillong ki la pynlong ïa ka jingïa-lang kaba ar sngi kata ha ka 28 bad 29 tarik mynta u bnai halor ka jinghikai ban ïada bad ka jingpynsngewthuh ïa ki jingpang pyndonkam ïa ka jingdih drok.
Ha ka jingïalang plie ïa ka workshop, ka Direc-tor General of Police (DGP) ka Jylla ka Kong I Nongrang, IPS, ka la long kum ka kongsan bad ka la ai jingkren shaphang ki jingeh kiba mih ha ka imlang sahlang na ka jingktah jong u drok. Ka DGP ka la ban jur ruh ba dei ban pynlong ïa kiba kum kine ki jingïalang ban pynsngewthuh bad ai jinghikai ïa ki samla pule bad ïa ka imlang sahlang hi baroh kawei, kumno ban ïaleh pyrshah ïa kane ka jingbym shongsuk ha ka imlang sahlang.
Katba u Bah Francis G Kharshiing, IPS, (Retd.) bad Mission Director, DREAM haba ai jingkren u la ban jur ba ka jingdih buaid kam dei ka jingduna ha ka akor hynrei ka dei ka jingpang, bad u la ban jur ba dei ban ïaleh pyrshah ïa kane ka jingdih pynbuaid.
Ka Principal ka Sankardev College, Dr. Eureka FP Lyngdoh, ka la ai ka jingkren pdiang burom bad ka Kong Eugenia Kyndiah, Convener jong ka Alumni Committee, ka la pynpaw ïa ka jingdonkam ban ïai bteng ha ka ban pynsngewthuh ïa ki paidbah, khamtam ïa ki samla pule halor ka jingdih drok bad ki jingma kiba mih na u.
Katba ha ka jingïalang ha ka sngi pynkut (Valedictory Session) ka Kong CD Lyngwa, MCS, Director ka tnat Social Welfare, ka la long kum ka kongsan. Ha ka jingkren jong ka, ka la ai khublei ïa ka jingpyrshang jong kane ka jaka pule ban pynlong ïa kiba kum kine ki prokram kiba don jingmut kiba ïarap shibun ïa ka imlang sahlang.
U Bah Manbor S Warjri, Coordinator ka IQAC I la ai ia ka jingkren khublei. Ha kane ka jingïalang ki la don ruh ki riewshemphang kiba la kren halor ki bynta bapher bapher jong ka jingpang haba pyndonkam ïa u drok.
Ka Dr. Rica Lamar, ka Director jong ka Manbha Foundation, ka la batai ïa ka jingdih drok kum ka jingpang, ki daw jong ka, ki dak jong ka jingsangeh, bad ki jait dawai.
Ka Dr. Chayanika Sarma, Psychiatrist ka Supercare Hospital, ka la kren halor ka jingma kaba mih na ka jingdih drok kaba ktah ïa ka koit ka khiah bad ka imlang sahlang, kynthup ïa ka jingkha khun ha ki khynnah samla bad ki buit ban ïada.
U Bah J Suting, MPS, Deputy Superintendent of Police (HQ), Shillong, Meghalaya u la ai jingmut ïa ki lad pathai khubor bad kiwei kiwei ban pyndonkam da ki lad kiba shngaiñ bad ka aiñ NDPS.
U Bah Barry Leslie Kharmalki, Secretary, Meghalaya User’s Forum, u la ïathuh ïa ka jingïaid lynti jong u kaba 18 snem jong ka jinglong sotti bad u la ong ban long kiba stad bad kiba sian.
U Jeremaiah Nongrum, President, Meghalaya User’s Forum, u la kren ïa ki jingeh halor ka jingdih drok bad u la ban jur ïa ka jingkyrshan jong ka longïing ha ka ban jop ïa kane ka jingdih pynbuaid.
Ha kane ka workshop la wan ïa shimbynta haduh 350 ngut ki khynnah pule na ki skul, ki kolej bad skulbah bapher bapher jong ka nongbah. Ha kane ka jingïalang la wan ban ïashimbynta lang ruh da ka Kong Theilin Phanbuh, Padmashree, ka Prof TK Bamon, Vice Chancellor ka MLCU, ki nongmihkhmat jong ka seng kynthei bad ki sengtrei mon sngewbha bapher bapher.
Ïa ki jingïalang la pynïaid da ka Kong Ruth Kharbamon, Asst IQAC Coordinator.
U Dr. Eddie Mukhim, Psychiatrist, San-Ker /New Life De-addiction Centre, Shillong u la kren halor ka jingdih buaid kum ka jingpang bud sa u Bah Eboton Kharkongor, Counselor bad Soft Skill Trainer uba la kren halor ki jingeh ha ka ïing ka sem bad ka jingïadei hapdeng ki kmie ki kpa. U Bah Meban Tariang, KRIPA Foundation, Shillong u la kren halor ka Community Mobilization & Engagement: Ka jingïada, ka jingsumar bad ka jingpynbha.
Ïa kane ka workshop la kyrshan da ka Directorate of Social Welfare ka Sorkar Meghalaya, lyngba ka DREAM.
