Shillong, Lber 31
U rangïalehkai wushu ka Jylla hapoh ka lama jong ka Meghalaya Wushu Association (MWA), u Kyrshanbor Romeo Songthiang u la khur ïa ka takma rnong ha ka 8th Senior National Wushu Federation Cup.
Ïa kane ka lympung la sdang naduh 24 haduh 28 tarik mynta u bnai ha Bilaspur, Chattisgarh bad la pynïaid da ka Wushu Association of India ha ryngkat ka Chattisgarh Wushu Association.
Kat kum ka kyrwoh la ong ba ka jinglah ban khur ïa katei ka takma ka la wan hadien ba u Kyrshanbor u la hap ban ïakhun ha ka Toalu Nandao ryngkat bad kiwei pat ki nongïalehkai kiba kynsai jong ka ri ha ka Toalu.
Lah ban pynkynmaw ba u Kyrshanbor u la wan basaw ha ka 38th National Games kaba dang shu dep long ha Dehradun Uttarakhand. Ka jingkyrmen ka don shibun ïa ki khynnah ïalehkai Wushu ka Jylla lada ka MWA kan ïoh noh kloi ïa ka Toalu arena kaba kim pat don haduh mynta. Te kumta ka MWA ka kitbok kitrwiang ïa baroh kiwei pat ki nongïalehkai wushu ka Jylla khamtam ïa ka kynhun ïalehkai Sub Junior bad Junior kiba dang leit ïashim bynta mynta sha Ahmedabad Gujarat sha ka Khelo India Women’s League bad ïa kiwei ruh kumjuh.
