Dallas, Lber:
Katkum ki khubor, la ong ba ki paidbah nongshong shnong ka Dallas, ha ka Sngi Nyngkong ki la mih paidbah ban iakhih ia ki kyndon pyrkhing ia ki phetwir ba la wanrah da u President ka United States- u Donald Trump.
Kumta la ong ba kitei ki paidbah ki la ialum lang bad ki la mih na kiba bun tylli ki dong jong katei ka nongbah, bad ki rah ruh ia ka lama jong ka ri America kum ka dak jong ka jingiatylli bad ka jingsngew ieid ri jongki lang kawei.
Katei ka jingiaid paidbah ka la sdang na ‘Cathedral’ bad la pynkut ha ka jaka ba don ka ‘City Hall’, ha kaba kitei ki paidbah nongiakhih ki la ialum lang hakhmat katei ka jaka ban pynpaw ia kawei ka sur jingdawa ia u Trump ba u dei ban weng biang noh ia kito ki kyndon kiba u la pynbna baroh, pyrshah ia ki phetwir bad ki paidbah ba nabar jong ka US, kiba la shong- sah bad kiba la im ha US la bun- bun snem mynta.
Kitei ki paidbah ki la ong ba ki donkam ban ioh ia ka jingphai khmat na ka liang ka sorkar bad ki bor pyniaid jong ka US bad kumta kim don lad shuh lait na ka ban shu ialum lang khrui bad ban pynpaw ia ka jingsngew bad ki jingdawa jongki naka bynta ka hok jongki, ba ki la im baroh shi katta hapoh katei ka ri.
