Nongstoiñ, Lber 31
Ka Khliehmawlieh Youth Club ka la ïoh jingjop ha ka Super Division na ka bynta ka NDSA Premier League Football Tourna-ment 2024-25 ba la pynïaid da ka Nongstoiñ District Sports Association.
Kane ka nam tam ka la wan hadien ba ka la lah ban pynliem ïa ka Pyndengrei SCSC da 2-1 kol ha ka Lah Sngi U Blei ha madan New Nongstoiñ.
Kane ka jingïakhun ka la long shisha kaba itynnad hapdeng kitei ar tylli ki kynhun bad dei ka Khliehmawlieh YC kaba la ïoh ban pynkhih jar nyngkong eh ha ka minit kaba 46 lyngba u Rishan Nongsiej.
Hadien katto-katne por ka Pyndengrei ka la lah ban pynïakhaid kylla lyngba u Silvester Thongni ha ka minit kaba 60. Pynban da ka jingbakla thep hi da u rangïalehkai shadien ka Pyndengrei u Sunevening Ïawphniaw ka la pynlong ïa ka Khliehmawlieh ban ïoh ïa ka kabu kaba biang ha ka minit kaba 77 bad ban ïoh jingjop shisyndon.
Haba phai sha ka First Division, ka Lawse SC ka la pynliem noh ïa ka Jaidoh SC da 5-1 kol.
Na ka liang ka Football Committee jong ka NDSA ka la pyntip ba ka jingïalehkai ha ka 1 tarik u Ïaïong ha ka Super Division kan long hapdeng ka Tiehsaw Pengkyllut pyrshah ïa ka Upper New Nongstoiñ ha ka por 2:30 nohphai sngi ha madan New Nongstoiñ.
