Shillong, Lber 31
Ka Dorbar Shnong Nongkseh ha ka 31 tarik u Lber, 2025, ka la plie paidbah ïa ka ophis bad ïingdorbar bathymmai jong ka shnong kaba la tei da ka jingbei tyngka na ka skhim MP jong ka Rajya Sabha bad Chief Minister’s Special Development Fund (CMSDF) ïa kaba la pynlong ha Nongkseh Indoor Stadium.
Ha kane ka sngi, u MP ka Rajya Sabha, Dr. W.R Kharlukhi u la long kum kongsan uba la ïoh ban khap ïa u ribon bad ban plie paidbah ïa kane ka ophis shnong ha ryngkat ka jingïadonlang u BDO ka Mylliem C&RD Block, Bah Toshan Marweiñ MCS, u OSD jong u Myntri Rangbah ka Jylla, u Bah Daniel Thangkhiew, u doktor ba pynïaid ïa ka Shastri Memorial Dispensary, ki nongïalam ka Shnong Nongkseh bad Lummawbah, u Rangbah Shnong ka shnong Nongkseh, ki ‘riew rangbah ka shnong, ki longkmie-longkpa nalor kiwei-kiwei.
Haba ai jingkren ha kane ka sngi kum u kongsan, u MP ka Rajya Sabha, Dr. WR Kharlukhi, u la ai ka jingïaroh ïa u BDO ka Mylliem C&RD Block uba la lah ban ïarap ïa ki shnong-ki thaw bad ban pynïadei bad ki paidbah.
U la ong ruh ba kum u MP ka Rajya Sabha u la ïoh tang T.5 klur na ka skhim ban ai jingïarap sha ki paidbah ka Jylla, kumta u la leh katba lah ban ai jingïarap sha ki paidbah ka Jylla.
Na ka liang u Bah T Marweiñ haba ai jingkren ha kane ka sngi, u la ai jingïaroh ïa ka shnong Nongkseh namar ka la ai ïa ka nuksa kaba bha da kaba lah ban pynurlong ïa shibun ki kam da kaba kyntu ruh ïa ka shnong ba kan nang ïai pynbha ruh kum ïa ki madan phutbol, madan basketball lane ïa ki jaka jngohkai pyrthei namar ba na ka liang ka Block, ka long kaba la kloi ban pdiang ïa ki jingai jingmut jong ki na ka bynta ka jingmyntoi ban wanrah sha ka shnong.
Na ka liang u Rangbah Shnong ka Nongkseh, Bah Myrank Thangkhiew haba kren ha kane ka sngi u la pynpaw ka jingsngewnguh, da kaba pynpaw ba ka shnong ka la angnud la slem bah ban ïoh noh ïa ka ïing paidbah kaba paka.
“Hadien ka jingkhmih lynti da ki snem, khatduh kane ka jingthmu ka la urlong lyngba ka jingkyrshan na ka skhim MP bad ka jingthmu jong u Myntri Rangbah ka Jylla ryngkat ka jingïarap ba kongsan na u Bah Daniel Thangkhiew”, ong u Rangbah Shnong.
