Nongpoh, Lber 31
Ka MDC ka Nongpoh ka Kong Rona Khymdeit, ka la pynkynmaw ïa u Symbud Myntri Rangbah ka Jylla ba khmih ïa ka tnat PWD (Roads) Bah Prestone Tynsong, ban siang rong noh ïa ka surok Nongpoh-Umden-Sonapur (NUS).
Ïa kane na ka liang jong ka Kong Rona ka la kren ha ka tamasa Shad Sajer jong ka Raid Nongpoh kaba la pynlong ha ka sngi Saitjaiñ.
Katkum ka jingong jong ka, kane ka jingshna ïa ka surok ka dei kaba la dep ban buh mawnongrim dang shen bad ki paidbah mynta ki la angnud bad khmih lynti lano ban sdang pynhap maw bad siang rong noh ïa ka surok.
Lah ban kdew ïa ka surok Nongpoh-Umden la buh mawnongrim ha ka 10 tarik Nohprah 2024. Kane ka surok kaba jrong kumba 20 Km eiei, la mang ban pyntrei ha ka jinglut kumba T.49.53 klur na ka State Plan katba ïa ka surok Umden sha Sonapur kaba jrong kumba 38.9 Km la mang ban pyntrei ha ka jinglut ba T.47.20 klur lyngba ka PMGSY-III.
