Shillong, Ïaïong 01
U Working President ka National People’s Party (NPP) uba peit ïa ka seng ha Garo Hills, Marcuise N Marak bad ruh kum Myntri Sorkar u la dawa na u Myntri Rangbah barim ka Jylla, N Biren Singh ba u dei ban panmab halor ka jingkynnoh ba u PA Sangma (Bam Kwai ha Dwar U Blei) u kwah ban phiah ïa ki Jylla hapoh ka thaiñ Shatei Lam Mihngi.
Haba pynrem ïa ki jingkynthoh pyrshah ïa u nongïalam ka Jylla Meghalaya, u Marcuise u la ong ba u N Biren Singh u dei uba la thaw ïa ki jingkulmar hapoh ka Jylla Manipur bad baroh ki tip ïa kata, hynrei mynta u kynnoh ïa u PA Sangma u bym don shuh ha kane ka sla pyrthei.
“Kane ka long ka bym lah ban pdiang, ngi pynrem jur ïa kane bad nga dawa na u N Biren Singh ba un panmab, namar u PA Sangma u dei u Nongïalam ba janai, u la dei u Nongïalam hapoh ka ri India bad uba la trei na ka bynta ka bha ka miat jong ki paidbah shatei mihngi, bad ka nongrim ban pynïatylli ïa baroh”, la ong u Marcuise.
U la ong ba dei halor kine kiei-kiei ba u pynrem jur ïa ka jingkren u Biren Singh bad na ka liang ka NPP Garo Hills, u dawa ba dei ban panmab mardor halor kane ka jingkynthoh.
Haba kylli, na ka liang u Nongïalam ka NPP u la ong ba lehse ka lah ban dei na ka daw ba ka NPP ka la weng noh ïa ka jingkyrshan na ka Sorkar u Biren Singh ha Manipur kaba pynlong ïa u Myntri Rangbah barim katei ka Jylla ban kren kumtei.
Ka thma ktien ka la mih hapdeng u Myntri Rangbah ka Jylla, Conrad K. Sangma bad u Myntri Rangbah barim ka Manipur, Nongthombam Biren Singh hadien ba u la sei ïa ka kyrteng jong u Lamphang barim ka Lok Sabha, P.A. Sangma (Bam Kwai ha Dwar U Blei) haba phai sha ka jinglong-jingman ka saiñ pyrthei ha Manipur.
U Singh, uba la iehnoh kam kum u Myntri Rangbah ka Manipur ha ka 9 tarik u Rymphang, 2025 – ar snem hadien ka jingïakynad jaidbynriew ha katei ka Jylla, ha ka Lah Sngi U Blei (31 tarik Lber, 2025) lyngba ka rynsan lad pathai ‘X’, u la kynnoh ïa u Lamphang barim ka Lok Sabha halor ka jingkyrshan ban phiah ïa ka thaiñ Shatei Lam Mihngi katkum ka jingdon ki jaidbynriew, da kaba buh ruh ïa ka ‘Video’ barim jong ka jingkren u Purno Agitok Sangma ha Lok Sabha ban kyrshan ïa ki jingkam jong u.
Halor kane ka jingkynthoh jong u Singh, na ka liang u Myntri Rangbah ka Meghalaya, Conrad K Sangma ruh u la pynphai ktien kylla da kaba ong ba ka jingkren ba la dep jong u P.A. Sangma (Bam Kwai ha Dwar U Blei) ha kaba ïadei bad ka jingthaw ïa ki Jylla kiba kham rit na ka bynta ki kynhun bapher-bapher ka long haba ïadei bad ka jingdawa jong ki seng bapher-bapher kiba mihkhmat ïa ki jaidbynriew bapher-bapher.
“Ka jingpyrshang u Biren Singh ban pyni ïa ka jinglong-jingman katba ka Jylla ka dang don hapdeng ka por kaba eh ka long ka bym ïahap. Ka paw shai ba u kwah ban leh ïa ka saiñpyrthei kaba jakhlia”, la pynphai ktien u Myntri Rangbah uba dei u Nongïalam rangbah ka NPP bad khun jong u PA Sangma.
