Shillong, Ïaïong 01
Ki pulit na ka kynhun jong ka Special Cell ka East Khasi Hills ki la ïoh ban kem noh ïa ki lai ngut ki snar nongtuh arshaka (bike) bad ruh ïa ki ar ngut kiwei pat kiba dei ki nongïarap ha ka ban pyndie ïa kine ki arshaka sha ki nongthied na Bangladesh.
Ha ka kyrwoh khubor na u Superintendent of Police ka East Khasi Hills, Bah Vivek Syiem, u la ong ba ïa kitei ki lai ngut ki nongtuh la ïoh ban kem ha ka por dang step phyrngab na ki thaiñ 101 Area katba ki dang ïaid sharum shaneng ban wad ïa ki arshaka kiba pynïeng harud surok.
Kitei lai ngut kiba la shah kem ha ki pulit ki dei ba la tip kyrteng kum u Timus Warbah (30 snem), u Babar Mawblei (26 snem) bad u Synraplang Makri (23 snem). Kine baroh ki dei na ka shnong Jirang ha Ri-Bhoi. Ki pulit ki la kurup ruh ïa ka kali Alto kaba ki la pyndonkam ban leit kylleng ka nongbah na ka bynta ban wad ïa ki arshaka kiba pynïeng ha ki rud surok.
Nalor ka jingïoh kem ïa kitei lai ngut, ki pulit ki la ïoh ruh ban kurup noh ïa ka bike KTM kaba ki dang shu dep ban tuh ha ka step jong ka Lah Sngi U Blei na ka thaiñ Malki na kine ki nongtuh.
Shuh shuh na ka liang jong ki pulit ha ka jingtohkit bad buddien halor kane ka kam, ba kumno pat la pynïaid ïew ne die ïa kine ki arshaka, ki la ïoh ban kem noh sa ïa ar ngut ki briew ba la tip kyrteng kum u Meaibor Kharryjja, 26 snem na Sohlap Shella bad u Bakordor Rapmai, 24 snem na Jatap Shella, kiba long ki nongïarap jong kitei ki nongtuh ban leit pyndie bad pynpoi pat ïa kine ki arshaka kiba la tuh na nongbah Shillong sha ki nongthied ha Bangladesh.
Ka khubor na ki pulit ka la ïathuh ruh ba kane ka kynhun, ka dei kaba la donkti ha kiba bun ki kam tuh arshaka na nongbah Shillong. Mynta kine baroh san ngut ki don hapoh along jong ki pulit bad ka jingtohkit ban lap ksai shuh ïa kiwei ki kam tuh ka dang ïaid shakhmat.
