Shillong, Ïaïong 01
Ka long ka jingkmen ïa ka Jylla hi baroh kawei ha kaba uwei na ki nongñiah saikil, Kevin Lyngdoh Sangriang u la khur ar tylli ki takma ksiar ha ka 21st National Mountain Bike Championship 2025 kaba la long ha Morni Hills kaba ha Haryana.
Une u khynnah ba dang 15 snem karta na Mawkyrwat, South West Khasi Hills, u la khur ïa kitei ki takma ha ka Cross Country Time Trial bad ha ka Cross Country Olympic (XCO). Katba ïa ka takma rupa la khur da u Meban Aiboklang Suïam uba na Nongthymmai, Shillong ha ka Down Hill (DHI).
Ïa kane ka jingïakop kaba la sdang naduh 28 haduh 31 tarik u Lber mynta u snem, la pynlong da ka Haryana Cycling Association hapoh ka jingkhmih jong ka Cycling Federation of India.
Ha kane ka jingïakop ka Meghalaya Cycling Association ka la phah haduh 14 ngut ki nongshim bynta ha kaba wat la kim shym la lah ban kynjoh sha ka thong, pynban ki la lah ban pynpaw ïa ka jingtbit ha kane ka jingïakop ñiah saikil.
U Kevin wat lada u la leit ïashim bynta sha katei ka jingïakop da ka saikil kaba tad tam kaba tang T. 1 lak tyngka haba ïanujor bad kiwei pat ki nongïashim jong kiwei pat ki Jylla kiba la ñiah da ki saikil rem dor kiba la kot sha T. 7 lak tyngka, pynban u Kevin u la lah ban pynpaw ïa ka jingtbit na ka bynta ban khur ïa kitei ar tylli ki takma ksiar.
“Nga pynpaw ka jingsngewnguh ïa ka Sorkar Jylla hapoh ka jingïalam u Myntri Rangbah Conrad K. Sangma uba la lah ban pynïoh ïa nga ka saikil kaba T. 1 lak tam bad lada khlem da ïoh ïa ka ngan ym lah ban kynjoh sha ka thong jong ka jingjop. Hooid, kiwei ki nongïalehkai na kiwei pat ki Jylla ki la ñiah da ki saikil kiba rem dor kiba la kot shaduh ki T.7 lak tyngka shaneng, pynban nga la lah ban ïalehkai bha ban pyni ïa ka jingkhlaiñ hakhmat kitei ki nongïalehkai,” la pynpaw u Kevin, uba la pynpaw ruh ka jingsngewnguh kumjuh ïa ka Meghalaya Cycling Association (MCA) lem bad ka Mawkyrwat Cycling Association kiba la plie lad na ka bynta jong u ha kane ka kam ïalehkai.
Ha u snem ba la dep, u Kevin u la khur ïa ar tylli ki takma rupa ha ka Cross Country Olympic (time trial bad mass start youth category) jong ka 20th National MTB Championship kaba la long ha Haryana. “Kane ka dei ka sien kaba ar ïa nga ban leit ïashim bynta shabar Jylla bad ha u snem ba la lah nga la khur ïa ar tylli ki takma rupa.”
Kumba ka paw mynta ka jingangnud jong u Kevin ka long ba shisien ka sngi un lah ban pynurlong ban mihkhmat ïa ka ri India sha ki jingïakhun ñiah saikil ki ban long shabar ri. “Nangne shakhmat ngan ïai trei shitom shuh shuh khnang ba ngan ïoh ka lad ban leit shim bynta shabar ri.”
Ha kawei pat ka liang u President ka MCA, Bah Lening Bareh u la pynpaw ba kumba ka long mynta ka synjuk ka donkam ïa ki lad jingïarap na ka Sorkar Jylla ba kan pynbiang ïa ki tiar ïalehkai kum ki saikil bad kiwei ki jingdonkam khnang ban lah ha ka ban saiñ dur ïa ka lawei jong ki khynnah kiba don ïa ka sap ba kyrpang ha kane ka kam ñiah saikil.
“Haduh mynta ngim don ïa ki coach kiba pura, hynrei kum ka synjuk ngi ïaleh ban ai jinghikai ïa ki khynnah lyngba ki nongïalehkai ba la kham rangbah (senior players). Te kumta ngi kyntu ïa ka Sorkar ba kan ïarap ha ka ban pynbiang ïa u coach ba pura kumba long kiwei ki jylla jong ka ri khnang ban lah ban sei shuh shuh ïa ki nongñiah saikil kiba kynsai,” la bynrap u Bah Bareh hadien ba la dep ban pdiang burom ïa kane ka kynhun kaba la wanphai sha la ïing.
