Shillong, Ïaïong 01
Ka Khasi Students’ Union (KSU) lyngba ka Employment Monitoring Cell ha ka Sngi Ba-ar ka la ong ba kan ym ai lad ïa ka NEIGRIHMS ban ïaid shakhmat bad ka jingthung kam ïa ki nos lada kane ka bynta kam ïaid katkum ka jingmyntoi jong ka jaidbynriew.
“Ngim shym hun ïa ka jubab u Director bad ngi la pynkut ba ngi kwah ba baroh ki dorkhat kiba ngi la ai sha u, un ai ïa ngi da ka jingthoh – na ka liang u Director u la pan por ban pyndep ïa kane hapoh shi taïew,” ong u Assistant General Secretary bad Chairman ka Employment Monitoring Cell ka KSU, samla Reuben Najiar hadien ka jingïakynduh bad u Director ka NEIGRIHMS, Prof. (Dr.) Nalin Mehta.
U la ong ruh ba ka seng ka la pan da ka jingthoh (na u Director) ha ryngkat baroh ki kopi ba la phah sha ka NEIGRIHMS da ka tnad treikam ka Sorkar Pdeng khnang ban ïanujor bad balei ka Sorkar India kan kheiñ dewthala tang ïa ka Jylla katba ïa kiwei pat ka ai lad katba ki kwah.
“Hadien shi taïew ngin wan ïakynduh biang ïa u Director bad lada ki jingdawa jong ka seng kim urlong, kam myntoi ba kane ka jingthung kam kan ïaid shakhmat,” u la ong.
Kumba ka long mynta, u la ong ba ki Khasi kin ym ïoh satia ïa ka kam, naba na 105 tylli ki kam ba la pyllait haba ïadei bad ka ‘Nursing Officer’, tang 2 tylli kiba dei na bynta ki ST – kiba lah ruh ban ïoh na kiwei pat ki jaidbynriew.
Halor ka jingwan trei kiba nabar, u la ong ba kumba la ïohi, bun kiba wan nabar ki trei torti ïa ka kam.
“Ïa mynta, ïa kane ka jingpynbna dei ban pynsangeh shuwa shi por kat bym poi sha ka rai kaba shai, Ngim shah ba kane ka jingthung kam kan ïaid shakhmat,” ong u samla Najiar.
Na ka liang ka seng kan sa aiti ruh ïa ka jingthoh sha ki MP ka Jylla (Dr. Ricky A.J. Syngkon bad Saleng Sangma) khnang ba ki lah ban shimkhia bad pynsngew ïa kane sha ka tnad treikam ka Sorkar Pdeng.
“Ngin ym ai lad ïa kane ka jingthung kam ba kan ïaid shakhmat lada kam ïaid katkum ka jingmyntoi jong ka jaidbynriew jong ngi,” la ban biang utei u nongïalam.
Hashuwa, u la ong ba hadien ba ka seng ka la wan ïakynduh ïa u Deputy Director ka NEIGRIHMS, ka la ïoh ban khmih bniah ïa ka ‘Roster Register’ bad hadien kane, ka la wan ïakynduh sa ïa u Director (mynta ka sngi) ban pynsngew halor ki katto-katne ki mat kiba ka seng ka la lap haba ïadei bad ka thung kam thung jam ha NEIGRIHMS.
Halor ka jingpynjlan ïa ka rta thung kam, u la ong ba haba phai sha ki jingpynbna barim, ka rta khatduh ban thep kam ka long 35 snem, hynrei ha ka jingpynbna bathymmai, la ïohi ba ïa ka rta thung kam la pynkut noh tang haduh 30 snem, bad kane kan long ka jingduhnong kaba khraw ïa kito kiba la pyndep ïa ki eksamin bapher-bapher.
Kumjuh, halor ka ‘Ratio’ haba ïadei bad ki ‘Nursing Officer’, u samla Najiar u la ong ba ka seng ka la pynsngew ha u Director ba ka dei ban long 80:20 – kata 80 ïa ki kynthei bad 20 ïa ki shynrang kumba la leh ha AIIMS bad kiwei-kiwei ki shlem jingpule/treikam.
“Haba phai sha ka jingshemphang ha ka kam – kino-kino ki nos kiba wan hangne, ki dei ban don 2 snem ka jingshemphang ha ka kam…ngim don eiei halor kane, hynrei kawei na ka jingbuh kyndon ka long ba kito kiba trei ki dei ban shakri ha ki jaka sumar Sorkar ne kiwei-kiwei ki jaka sumar kiba don 50 tylli ki jingthiah,” u la ong.
“Ha ka Jylla jong ngi, ngi don ki PHC, CHC bad ki jingthiah ki don tang kumba 5-10 tylli, bad wat la ki nos ki la trei la 5-10 snem, kim lah ban thep kam namar kim kot ïa ki kyndon ba la buh da ka NEIGRIHMS. Na ka liang jong ngi, ngi sngew ba wat la ki (nos) shakri ha kine ki jaka sumar kiba tang 5 ne 10 jingthiah ruh, ki long kiba bit ba biang ban trei,” la ong u samla Najiar.
Halor ka jingbhah kam ha ka Sorkar Pdeng, u la ong ba ka bhah long 50% na bynta ka ‘Open Category’, 27% ïa ki OBC, 15% ïa ki SC bad ki 7.5% ïa ki ST.
“Kane ngi ju ïohi man ka por ba ha ki shlem treikam ka Sorkar Pdeng, ki bun ki briew na kiwei pat ki Jylla… katba na ka Jylla jong ngi, ym don,” u la ong da kaba bynrap ba ka Jylla ka don ïa ka ‘ST List’, hynrei kam don pat ïa ka ‘OBC List’.
“Kine ki 27% ki mih naei haba phai sha ka jingthep kam ha ki shlem treikam ka Sorkar Pdeng. Katkum ka jingsngewthuh jong ngi ka long ba kiwei-kiwei ki ST, OBC jong kawei ka Jylla kin ym lah ban wan kam ïa ka bhah ST, SC, OBC hapoh ka Jylla jong ngi,” u la ong.
Shuh shuh halor kane ka bynta, une u nongïalam u la ong ba u Director u la pynpaw ba ka NEIGRIHMS ka dei ka tnad treikam ka Sorkar Pdeng bad katkum ki kyndon ‘All India’ ym lah ban kheiñ ba dei u OBC na kano-kano ka Jylla hynrei hap kheiñ lang ïa baroh.
