Shillong, Ïaïong 01
Ki samla pule ka skulbah NEHU hapoh ka shatri jong ka North Eastern Hill University Students’ Union (NEHUSU) bad ka Khasi Students’ Union (KSU) NEHU Unit ki la kyntu ïa ka Sorkar Jylla ban tuklar lem ban weng noh ïa u Prof. Prabha Shankar Shukla na ka shuki Vice Chancellor katei ka skulbah.
Ki nongïalam ka NEHUSU bad KSU NEHU ha ka Sngi Ba-ar ki la pyrshang ban ïakynduh ïa baroh ki Myntri ka Sorkar MDA-II na ka bynta ban aiti ïa ka dorkhas phah tuklar, hynrei kine ki samla pule kim shym la ïoh ban ïakynduh ïa baroh ki Myntri namar ka jingdon da kiwei ki kam, bad ki la ïoh ban ïakynduh tang ïa ka Kong M Ampareen Lyngdoh bad ïa u Bah A.L Hek.
Haba kren bad ki lad pathai khubor, na ka liang kine ki samla pule ki la ïathuh ba ki la aiti ïa ka dorkhas, ban kyrpad ba ki Myntri kin tuklar lem mardor ha ka ban pynbeit ïa ka rukom treikam bad rukom pynïaid ka North Eastern Hill University (NEHU).
Ki la ong ruh ba ki la kyntu jur ban ïoh ïa ka jingkyrshan kaba pura na ka bynta ban pynbeit ïa ki kynrum-kynram kiba la ktah ïa ki samla pule, ki nonghikai bad ki nongtrei jong katei ka skulbah, namar mynta la bun bnai ym shym la don ba shimkhia satia.
“Ngi la pyrshang ban ïakynduh ruh ïa u Myntri Rangbah, na ka liang jong ngi ngin pyrshang ban ïoh ïakynduh ïa u Lat bad ïa u CM. Mynta ka sngi ngi la ïakynduh tang ïa ka Kong Ampareen bad Bah A.L Hek bad ngi la ai ruh ïa ka dorkhas ha kaba ïadei bad ka jingeh ha skulbah NEHU”, la ong u Sandy Sohtun President ka NEHUSU.
Kine ki samla pule ki la pynpaw ruh ka jingbym hun ïa ka rukom thung Pro Vice Chancellor ha katei ka skulbah, ha kaba ki la ong ba kim pyrshah ïano-ïano, hynrei ki pyrshah ka dei halor ki kyndon, da kaba kdew ba ïa ka Prof. S.M Sungoh la thung Pro VC naduh mynshem snem da ka rukom ka bym biang bad ka la kyntait ha katei ka por, pynban kaba lyngngoh mynta pat ba ka la pdiang ban shimti ïa ka kam Pro VC da kaba pynpaw ïa ka jingbthah kaba naduh u Naiwieng 2024.
Ha katei ka dorkhas ba la aiti sha ki Myntri Sorkar, la pynpaw ba baroh kiba don bynta bad ka NEHU ki la ïai bteng ban pynlong ïa ki jingïakhih pyrshah ïa u Prof. Prabha Shankar Shukla halor ka jingbym larkam jong u bad halor ka jingkynnoh ba ka la don ka jingpyndonkam bakla ïa ka bor ban pynïaid ïa ki kam jong ka skulbah.
La pynpaw ruh ba halor kitei ki kynrum-kynram, ka NEHUSU bad KSU NEHU Unit ki la pynlong ïa ka jingshah thngan ha ka 5 tarik u Naiwieng 2024, hynrei la pynsangeh noh ïa katei ka jingïakhih hadien ba la ïoh ïa ka jingkular na ka Sorkar Pdeng ba kan sa leh ïa kaba donkam. Kumta ka la pynmih ïa ka hukum ha ka 14 tarik u Naiwieng 2024 lyngba ka Ministry ba la thung ïa ka Inquiry Committee ban tohkit halor kitei ki jingkynnoh. Ha ka jingwan jngoh katei ka Committee ïa ka NEHU, kitei ki kynhun ki la aiti ïa ki kot ki sla bad ïa ki sakhi satar ban kyrshan ïa ka jingkynnoh ka jong ki.
Nalor kane, la pynpaw ruh ba katkum ka shithi na u Chairman jong ka Inquiry Committee ha ka 28 tarik u Naiwieng 2024, ka bor kaba dei khmih ka la pynjlan sa 15 sngi ban pynkhreh bad pynbiang ïa ki jinglap bad ban aiti ïa ka kaiphot. Hynrei, wat hadien ba katei ka Committee ka la dep ban wan jngoh, kam shym la don kano-kano ka jingpyntip ne jingshim ïa ka sienjam, pynban la shu ieh ïa ka skulbah ha ka umdum.
“Kumba phi ïohi ka committee kam pat shym la ai satia ïa ka kaiphot haduh mynta, na ka liang jong ngi ngin dang thoh shithi ban pan jingshai na ka Ministry bad ngin rah ïa kane ka mat sha u Lat bad sha u Myntri Rangbah”, la ong u Sandy.
