Shillong, Ïaïong 01
Ka Sorkar Meghalaya Democratic Alliance (MDA-2) kaba la ïalam da ka National People’s Party (NPP) ba la synroplang ka UDP, BJP, HSPDP bad ki MLA shimet kim pat ïakren ïano ban phah kum MDC shu sieh sha Khasi Hills Autonomous District Council bad sha Jaiñtia Hills Autonomous District Council.
Kum ban shu pynkynmaw ha kine ki sngi hadien ba la ïoh ban ïakren bad u CEM bathymmai ka KHADC Bah Shemborlang Rynjah, u la ong ba ka Executive Committee kan sa phah ïa ka kyrteng sha ka Sorkar Jylla ba kan mynjur ba un long u MDC shu sieh sha KHADC. Katkum ka khubor ba la ïoh lum haduh mynta, ka Sorkar Jylla kam pat ïakren ban phah ïa ka kyrteng ban long kum u MDC shu sieh sha ka KHADC bad JHADC.
Katkum ki khubor la ïathuh ba ka Sorkar Jylla kan kham suk ban phah ïa ka kyrteng jong uno-uno u nongkitkam jong kano-kano ka seng saiñpyrthei sha Jaiñtia Hills Autonomous District Council namar ha katei ka council la bat ïa ka bor synshar da ka NPP bad UDP.
Ki khubor ki ïathuh ba ka NPP kaba ïalam ïa ka Sorkar Jylla kan nym ïoh da kaba suk ban shu sieh ïa u MDC sha KHADC namar ha kane ka council la synshar marwei da ka VPP.
Ki khubor ki ïathuh ba ka NPP kaba ïalam ïa ka Sorkar Jylla kan kham jwat ba kan sieh hi ïa u MDC sha KHADC namar shwa ban ïoh ka jingmynjur na u Lat ka jylla ka donkam ruh ka jingmynjur na ka Executive Committee jong ka KHADC kaba la ïalam da ka VPP.
Ka jingjwat ka NPP ban ïoh thung MDC shu sieh sha KHADC namar ha kine ki sngi haba ïoh ban ïakren u la pynpaw ba ka EC kan sa phah noh ïa ka kyrteng sha ka Sorkar Jylla ba kan ai jingmynjur ïa u MDC shu sieh sha KHADC hynrei ïa mynta um pat kwah ban ïathuh kyrteng namar u hap ap ïa ka jingbthah na ki Nongïalam bahalor ka VPP.
Kum ban shu pynkynmaw, ki MDC kiba ïakhun da ka ilekshon sha KHADC ki don 29 ngut bad uwei u dei u MDC ban shu sieh ynda la dep thaw ïa ka Executive Committee. Hynrei ha KHADC la sngewthuh ba ka jingthung MDC ba shu sieh kan kham slem lada ka EC bad ka Sorkar Jylla kin phah ar tylli ki kyrteng sha u Lat ka jylla.
