Shillong, Ïaïong 02
Ka lynnong bathymmai na bynta ki jaiñ Ryndia bad tnad Textiles ka Jylla ka la sdang ha kane ka liang, naba ka Jylla ka la ïoh jingpynskhem haba ïadei bad ka ‘Geographical Indication’ (GI) ‘Tag’ na bynta ki jaiñ thaiñ kti, ba la shna da ka kti, ki rong ba la ïoh na ka mariang, ba la pynmih khlem ka jingai dawai, ki tiar pyndon-kam kiba la ïoh bad pynmih da kaba burom ïa ka mariang – ka Ryndia, ryngkat ki mar thaiñ kti jong ka Jylla kumba la pynbna da ki bor pynïaid ka GI, Registrar Geographical Indications, Geographical Indications Registry, Intellectual Property Office, ka Sorkar India, ïa kaba la buh – kaba la pynrung kyrteng kum ka ‘G.I’ ha ka ‘website’ jong ka ‘G.I Authority’.
Ka tnad Textiles, ka Sorkar Jylla na ka por sha ka por ka la shim ki sienjam ban pynskhem bad shimkhia ïa ka jingtreikam baroh kawei ha ryngkat ka jingkyrshan jong ka NABARD bad jingïarap ba shemphang jong u Dr. Rajnikanth, kumjuh la pynsuk bad kyrshan shitrhem ïa ki aplikeshon ba la trei lang ba la shna da ka tnad Textiles bad ka Meghalaya Ryndia Producers Association (MRPA), ha kine saw snem ba la leit.
Ïa kane ka jingïaid lynti la sdang da ka tnad Textiles, mardor hadien ka jingithuh bad jingpynbna paidbah ïa ka Umden – Diwon kum ka shnong ‘Eri Silk’ banyngkong eh jong ka Jylla ha ka 12 tarik u Rymphang, 2021.
U Bah Frederick Roy Kharkongor, IAS, Principal Secretary ka tnad Textiles u la ïalam ïa ka kynhun kaba kynthup ïa ki heh ohpisar ka tnad, MRPA, ki nongthaiñ jaiñ lem bad ki barikor na ka shnong ‘Silk Village’ ban kyrshan tyngeh ïa ka ‘GI’ aplikeshon ha ka jingïalang kaba khatduh jong ka GI kaba la khot da ka ophis ka Geographical Indications Registry, ka Sorkar India kaba la long ha Kolkata ha ka 20 tarik Naiwieng, 2024.
Kine ki jingpyrshang ba la kdew haneng ki la urlong bad treikam ha ka rukom kaba ryntih lem bad ka jingïohi jngai (ha baroh ki liang) jong ka rukom treikam u Myntri Rangbah ka Jylla, u Conrad K. Sangma bad u Myntri ka tnad Textiles, Bah Paul Lyngdoh ban shim kabu ïa ki jingdon-jingem bad ban kyntiew tyngeh ïa ka ‘Brand Meghalaya’ lyngba ki mar ba kyrpang jong ka bad ki jingshemphang ba jylliew ha ka jingïaid lynti kiba la ïalam sha ka jingithuh ha ka liang ka ‘GI’ na ka bynta ka ‘Ryndia’ jong ka Jylla bad ki jingthaiñ kti ki Khasi.
Halor kane, na ka liang u Myntri Rangbah ka Jylla ha rynsan lad pathai ‘X’ u la ong, “Ka jingsngewkmen ban pynbna ba ïa ka Ryndia jong ka Meghalaya bad ïa ki jingthaiñ kti ki Khasi la ithuh lyngba ki ‘Geographical Indication’ (GI) ‘Tag’, kaba pynpaw ïa ka jinglong kyrpang jong ka lariti mynbarim bad ka jingtrei kti ba tbit jong ki.”
“Une u dei u mawmer ba khraw na ka bynta ki nongthaiñ jaiñ ka Jylla kiba ïai bteng ban ïaid shakhmat bad ki jingpyrshang kiba dei ban ïoh jingïaroh ban pynneh-pynsah ïa ka jingriewspah ha ka thaiñ kti tynrai, bad ban ïathuh ïa ka khana, ka pateng, bad jingieh noh shadien jong ngi lyngba ki snem,” u la ong.
