Shillong, Ïaïong 02
Ka Bengaluru FC ka la ïoh ïa ka jingjop ha ka semi final wat ba nyngkong jong ka Indian Super League (ISL) 2024-25 hadien ba ka la pynliem noh ïa ka FC Goa da 2-0 kol ha ka Sngi Balang ha Kanteerava Indoor Stadium kaba ha Bangalore.
Kane ka nam jop ka la wan urlong lyngba ka jingïarap pynthep da u Sandesh Jhingan lem bad u Edgar Mendez na ka bynta ban pynïoh jingkyrmen ïa katei ka kynhun ban jam sha ka final jong kane ka lympung.
Naduh kaba sdang ka jingïalehkai baroh ar kynhun ki la pyrshang ban ïakhun tyngeh ha kaba ki la ïoh ïa ki kabu kiba biang, hynrei kim shym la lah ban thep kol. Shwa ban kut ka jingïalehkai jong ka kylla step ka BFC ka la ïoh ban pynkhih jar nyngkong eh na ka daw ka jingbakla thep hi da u rangïalehkai shadien ka FC Goa u Sandesh Jhingan, uba la kum pyndei da ka khlieh hapoh box. Kane ka la wan hadien ba u Edgar Mendez uba la shut sha kol ha ka minit kaba 42.
Kane ka kynhun ka la thep biang ïa ka kol ba ar lyngba Mendez ha ka minit kaba 51. Kane ka la wan urlong lyngba ka jingïarap pynbuh bol da u Namgyal Bhutia ha kaba utei u rangïalehkai shakhmat na Spain um shym la pynlehnohei ïa kane ka kabu ksiar kaba u la ïoh.
Hadien katto-katne por ba la pynshong noh ïa u Mendez, ki rangïalehkai ka FC Goa ki la pyrshang ban ïakhun tyngeh ha kaba ki la ïoh bun tylli ki kabu kiba biang ban pynphai lyngba u Ayush Dev Chhetri, u Boris Singh nalor kiwei pat, hynrei kam shym la lah ban pynurlong.
Haduh kaba kut katei ka kynhun jong u Manuel Manolo kam shym la lah ban pynurlong bad ka la mad ïa ka jingshah rem.
Kine ki kynhun kin pynkhreh ïa ka semi final wat ba ar ka ban long ha ka 6 tarik mynta u bnai ha Goa.
